NAGBUY-OD ug naligo na sa iyang kaugalingong dugo nga naabtan sa kapolisan ang 24 anyos nga maestra human giluba sa suspek nga mosuway unta ug pangawat sa ilang staff house sa Kinilayan Village, Barangay Poblacion, lungsod sa Pangantucan, Bukidnon.
Patay si Genifer Buckly, dalaga, lumad nga taga Pantalan, Guipos, Zamboanga del Sur ug usa ka Jesuit volunteer teacher sa Pangantucan Community High School.
Samdan usab ang kauban niining giilang si Anne Kathleen Gatdula, 30, dalaga, usa ka socio-enterprise officer sa susamang tunghaan ug kauban ni Buckly.
Nahitabo ang insidente mga alas 2 sa hapon sa Agusto 23 sulod sa staff room nga gipanag-iyahan sa dalaga ug kauban niini.
Matud ni PSSg Mark Ariel Macana nga gisulod ang lawak sa duha sa suspek apan wala gidahom nga mobalik ang mga biktima hinungdan nga dihang nasapon giluba sa suspek si Buckly ug wala pa nakuntento giapil si Gatdula.
Si Buckly maoy nagrabehan dihang lima ka samad dinunggaban ang naangkon niini kon usa sa wala ug tuong bahin sa dughan, wala ug tuo nga bahin sa tiyan, ug likod nga bahin nga dihang gidali og dala apan patay nang nahidangat sa Pangantucan Doctor’s Hospital.
Ang iyang kauban nga si Gatdula nakaangkon sab og usa ka samad sa iyang tiyan nga anaa na karon luwas sa makuyawng kahimtang.
Matud ni Macana sa SunStar Superbalita nga wala nihunong sa pagpangita ang kapolisan sa suspetsado ug nadakpan kini mga alas 11:40 sa Agusto 24 kon asa ang suspek giilang si Alrod Villorejo Naquilla, 36, ulitawo, taga Lantay susamang lungsod. Ang pagkasikop niini hiinusang pwersa sa Pangantucan PNP pagpangulo ni Police Major Jerry Paronia ug 2nd Bukidnon PMFC Pol.Lt/ Richlie Murallon.
Taliwala gihimakak sa suspetsado ang pagpangluba positibo kini kaayong natudlo ni Gatdula.
Dugang ni Macana nga niadtong Agusto 13 nagpa-blotter na sa ilang buhatan kining mga biktima gumikan adunay mga nawalang butang sa ilang staff house ug posibleng gibalikan lang sa suspek niadtong tungora apan wala gidahom nga anaa mobalik ang mga biktima.
Nasayran nga notado na usab kini si Naquilla sa mga kaso sa pagpangawat dili lang sa Pangantucan apan kasikbit nga dapit.
Karon nga nagtingkagol na sa prisuhan ang suspetado kasong robbery with homicide ug frustrated homicide ang atubangon niini.