DUL-AN 500 ka mga representante sa nagkadaiyang sector ang nitambong sa roadshow sa Presidential Communications Operations Office (PCOO) kabahin sa Freedom of Information (FOI) Campus Caravan sa Cebu Normal University gahapon, Martes, Agusto 27.
Ang maong kalihukan gitambongan kini sa nagkadaiyang National Government Agencies, Local Government Units, Non-Government Organizations, Civil Society Organizations ug mga tinun-an sa Sugbo.
Inubanan sa PCOO ang Freedom of Information-Project Management Office ug katambayayong niini ang Philippine Information Agency (PIA) 7, Cebu City Government, ug ang CNU school administration.
Si PCOO Assistant Secretary ug FOI Director Atty. Kristian Ablan mao ang nipasabot sa FOI program sa mga nanambong.
Kining FOI, usa ka landmark legacy sa Duterte Administration nga naghatag og katungod sa publiko nga makapangayo og dokumento o impormasyon gikan sa gobyerno.
Samtang si Presidential Task Force on Media Security Executive Director Joel Sy Egco mao ang nipasabot sa inisyatibo sa gobyerno sa pagpanalipod niini sa press freedom ug ang pagprotehir sa mga kawani sa media.
Lakip sa maong roadshow ang “Rehabinasyon” diin mao kini ang kampanya sa kasamtangang administrasyon batok sa ilegal nga drugas ug ang gidamgo kiini nga mamahimong drug-free ang nasod.
Atol sa maong FOI Campus Caravan, mipirma usab si CNU President Dr. Filomena Dayagbil sa Memorandum of Understanding alang sa pagpatuman sa FOI Program sa CNU. (HBL)