KUSOG nga hangin ang masinati sa Visayas lakip na ang bawod nga moabot sa tulo ka metros hangtod karong Huwebes, tungod sa bagyong Jenny.
Matod sa Pagasa nga gikatakda nga mo-landfall ang maong bagyo sa Aurora, Isabela karong buntag, Miyerkules, kon wala pa man gani kini maka-landfall kagabii.
Niadto pang Lunes sa alas 5 sa hapon dihang nahimong bagyo ang maong low pressure area (LPA). Gikatakda usab kini nga mogawas sa Philippine Area of Responsibility (PAR) ugmang adlawa.
Matod ni Pagasa Visayas officer-in-charge (OIC) Engr. Al Quiblat nga anaa sa hinay ngadto sa kasarangan ang uwan nga masinati sa Sugbo hangtod karong adlawa.
Karong gabii gipanglatawan nga masinati na ang maayong panahon sa tibuok Visayas.
Dugang ni Quiblat nga anaa sa 30-50 kilometers matag oras ang masinati sa tibuok Kabisay-an.
Anaa usab sa 1.25 metros ngadto sa 3.25 metros nga bawod ang masinati sa kadagatan.
Bisan paman nga tulo ka bagyo ang niagi sa nasod karong buwan sa Agusto. apan anaa ra sa 76 millimeters sa uwan ang natali sa Pagasa sa Visayas nga ubos kon itandi sa 151.8 mm nga average sa buwan sa Agusto. Alas 4 sa hapon kagahapon adunay mga biyahe sa barko nakanselar.
Lakip niini ang mga biyahe gikan sa Angasil Port paingon sa Santa Rosa sa Olango, Hilton Port paingon sa Santa Rosa sa Olango, Mactan Wharf paingon sa Camotes nga puros mga gikan sa dakbayan sa Lapu-Lapu.
Kanselar usab ang biyahe gikan sa Cordova paingon sa Getafe, Bohol diin sagad niini mga motorbanca.
Wala ra hinuoy giisa nga gale warning ang Pagasa sa Visayas. (HBL)