WALAY kasayuran ang mga sakop sa Sinulog Foundation Inc. (SFI) labot sa executive order (EO) ni Mayor Edgardo Labella nga nag-umol sa Cebu City Sinulog Governing Board (CCSGB) para sa Sinulog Festival 2020.
Kini ang reaksyon ni Vice Mayor Michael Rama, kinsa bag-ohay lang nga napili isip chairman sa SFI, usa ka non-government organization (NGO) nga naumol niadtong 1984 para maoy modala sa kalihukan sa Sinulog inabagan sa Cebu City Government.
Gitug-an ni Rama nga sukad pa niadtong 1980 dihang naumol ang Sinulog ug namugna ang SFI, ang founder sa Sinulog nga si David “Boy” Odilao Jr. maoy napili nga chairman ug honorary chairman ang mayor kaniadto nga maoy kanunay nilang gisunod ug walay laing board sama sa EO ni Labella.
Nakurat
Si Rama, kinsa chairman sa SFI gikan 2002 hangtod 2016, nakurat dihang iyang nahibaw-an nga adunay giumol nga executive order nga iyang gihulagway nga sapaw (layer) sa SFI diin ang chairman mao si Labella kauban ang iyang 24 ka mga miyembro nga gilangkuban sa gobernador sa Cebu, walo ka miyembro nga tinudlo sa mayor, lima ka trustees gikan sa Sinulog Foundation Inc., duha ka member sa Sangguniang Panlungsod, Cebu City Police director, division superintendent (DepEd Cebu City), Rector sa Basillica, Regional Director sa LTFRB 7, Regional Director sa LTO 7, Head sa CCTO, Regional Director sa Department of Health ug Commander sa Central Command.
Gipadayag niya nga labing bag-ong sakop sa board sa SFI mao si kanhi Mmyor Tomas Osmeña ug ang mga karaang sakop mao silang Atty. Augusto Go, Frederick Ong, Edward Gaisano, Michel Lhuillier, Alfredo Go, Edward Hayco ug uban pa.
Ang bise mayor nagkanayon nga mopatawag siya og meeting sa mga sakop sa SFI, lakip na ang ilang presidente nga si Pericles Dakay ug sa executive committee nga gipangulohan ni Atty. Joy Pesquera ug executive director Jojo Labella nga igsuon sa mayor.
“I don’t know, maybe they are thinking that they can do better with this setup. Importante kaayo nga makombinser nato ang Sinulog Foundation Inc. kay ang Sinulog Foundation gi-create na siya so that dili maapil sa pulitika ang Sinulog,” pasabot ni Rama kinsa niingon nga nakahimo na sila og strategic planning sa Sinulog 2020.
Lakip sa mandato sa SFI mao ang pag-solicit og mga sponsor gikan sa mga benefactor nga gustong motabang sa Sinulog sanglit ang Cebu City Government dili mahimong makapangolekta ug sukad pa kaniadto, mohatag ra og ayuda ang City Hall para sa premyo sa mga mananaog dugang ni Rama.
Ang SFI maoy mangita og pundo para igasto sa Sinulog nga gihulagway ni Rama nga nagkinahanglan og kapin o kulang P40 milyones sa tibuok preparasyon diin katunga niini abagahon sa siyudad.
Rama nalibog
Iyang gipadayag nga hangtod karon wala pa siya makasabot sa katuyoan sa executive department nganong adunay CCSGB nga gitukod.
“I don’t know how to reconcile sa gusto sa mayor, governing board unya asa dapit ang Sinulog Foundation?” Padayag ni Rama kinsa niingon nga angay mahan-ay ang Sinulog sunod tuig gumikan usab sa pagsingabot sa ika-500 ka tuig nga anibersaryo sa Kristiyanismo sa nasod.
Si Rama gusto og kalinaw nga luwas gikan sa kasamok ang ilang pagserbisyo sa katawhan uban sa ilang tandem ni Labella apan iya sab barugan kon unsay husto para kaniya.
“Kinsa may gustong mag-away nga ang gusto nato karon tunhay ug hapsay pero og naa gyuy gusto magpa-away, mag-away jud.” dugang ni Rama
Kauban sa partido
Sila si Labella ug Rama maoy nag-uban sa partido dihang ilang gibuntog si kanhi Mayor Tomas Osmeña niadtong tuig 2013 ug nabaslan sila niadtong tuig 2016 ug napilde si Rama apan nidaog si Labella isip bise mayor apan sa nakalabay nga eleksyon diin si Labella na ang standard bearer, ilang napukan og balik si Osmeña.
Ang bise mayor nagkanayon nga ang wala sab niya masabti sa CCSGB isip policy maker nga maoy mo-aproba sa mga gipanghimo sa SFI mao ang ilang pag-organize og kalihukan labot sa selebrasyon sa Sinulog ug pakigtambayayong sa ubang ahensiya ug stakeholders.
Si Labella, kinsa tua pa sa gawas sa nasod atol sa pagsuwat niining balita, wala pa makahatag og opisyal nga pamahayag labot sa iyang pag-umol sa CCSGB niining iyang unang tuig pagdumala sa dakbayan sa Sugbo isip mayor.
Ang Sinulog Festival maoy nailang nga laing dako naga festival sa nasod ug inila sa tobuok kalibotan hinunda nga dugukon kini sa daghang lokal ug langyaw nga turista.
Mao kini ang kasaulogan sa unang pag-bot sa Kristiyanismo sa nasod nga dinhi nag-una sa dakbayan sa Sugbo pinaagi sa simbolo sa imahen ni Sr. Sto. Niño. (PAC)