MOABOT sa 6 ka mga Chinese national ang naluwas sa mga sakop sa City Mobile Force Company (CMFC) sa Lapu-Lapu City Police Office (LCPO) gikan sa usa ka guest house sa Barangay Bankal, pasado ala 1:00 sa kaadlawon niadtong Martes, Agusto 27
Ang 6 giingong gibugaw ug gipasud sa prostitusyon sa laing Chinese nationals.
Gawas sa 6, nasikop sa kapulisan ang gituohang nibugaw sa mga Chinese national o “Mamasang” nga nailhang si Zhang Huan, 30, usa usab ka Insek.
Matod ni Police Lieutenant Colonel Dexter Calaca, hepe sa CMFC sa LCPO, dunay nitaho sa ilang buhatan bahin sa prostitusyon sa usa ka guest house sa Bankal nga naglambigit ug mga langyaw hinungdan nga ilang gipanid-an una gilusad ang operasyon.
Giingong P30,000 ang bayad sa matag usa ka babaye.
Ang mga baabye gi-turnover na sa usab sa Chinese consul sa dakbayan sa Sugbo. (GCM)