NUNOT sa panawagan ni Presidente Rodrigo Duterte sa paglimpiyo sa kadalanan, ang dakbayan sa Mandaue nipatuman sa higpit nga unang clamping operations batok sa dagkong trucks nga nagpataka og parking sa dalan sugod kagahapon, Martes, Agusto 27.
Ug hangtod sa alas 4:00 sa hapon kagahapon, atol ning pagsuwat, wala pay na-clamp ang Traffic Management Enforcement Agency (Team) nga dagkong trak.
Ang dakbayan daan nang mipatuman sa pagdili sa dagkong sakyanan sa kargamento o trak nga mobiyahe sa gipili nga oras sa adlaw labi na sa rush hours.
Ang Mandaue naila nga “industrial city“ tungod sa kadaghang pabrika ug bodega hinungdan usab nga daghang dagkong sakyanan nga moagi sa dalan sa dakbayan.
Naila usab ang Mandaue nga “bottleneck” sa trapiko sa amihanan sa Metro Cebu tungod sa pag-agi sa tanang sakyanan padulong ug balik sa isla sa Mactan ug ngadto sa norte sa lalawigan.
Sa pagkakaron, ang dakong sakyanan una ang rumbo sa clamping apan dili angayang mokompyansa sanglit moisyu gihapon ang Team og citation tickets sa ubang sakyanan nga makalapas sa parking.
Unang gipatuman sa team ang pag-clamp sa mga dagkong sakyanan o trucks tungod kay gipaubos pa sa pagtuki ang probisyon sa clamping ordinance sa dakbayan kon diin dili manubag ang Team sa guba o kadaot kon masuyakan ang ligid panahon nga pugson sa drayber pagguba sa clamp, matod sa pangulo sa Team, Florentino Nimor.
“Today (kagahapon) I instructed our operations head nga magsugod na ug clamping sa atong mga trucks kay dili man kaayo na sila affected sa atong concern sa atong amendment due to katong damages incurred sa specific vehicle,” pulong ni Nimor.
Sa kinatibuk-an dunay moabot sa 40 ka clamps ang giandam sa Team nga gamiton sa pagsugod niini, napulo ini ang para sa mga dagkong sakyanan o trucks.
Duna kini tunok nga mobuslot sa mga ligid kon pugson niini pag-ikya sa drayber sa sakyanan bisan naka-clamp.
Moabot sa P1,500 ang multa sa maong salaod wala pay labot sa pending citations.
Gitutukan karon sa Team ang kadalanan sa North Reclamation Area kon asa moagi ang daghang trucks.
Hinuon, alang sa mga motorista sa kadalanan sa Barangay Guizo, matod ni Nimor, maghinayhinay na og pamahawa ang mga motorista nga ilegal nga mo-parking.
Gituyo nga mokuha og dagkong clamps tungod kay agianan sa mga de karga ug uban pang dumptrucks ang dakbayan ug angayan lang nga hipuson kining mosupak sa balaod.
“Kanang naka-obstruct sa traffic on top of it naa tay laing violations,” matod ni Nimor sa Superbalita Cebu.