SUPERBALITA CEBU

Barko nasunog; 245 survivors

DUHA ka senior citizens ug usa ka bata ang patay atol sa pagkasunog sa barkong pasaheroan nga M/V Lite Ferry 16 niadtong Martes sa gabii, Agusto 27, sa kadagatan sa Dapitan City, Zamboanga del Norte.

Moabot og 245 ang gilistang survivors, apan sa opisyal nga manifesto, dunay sakay nga 239, dala na ang mga tripolante sa barko.

Ang barko gikan sa lungsod sa Samboan, habagatang Sugbo.

Sukwahi sa sayo nga mga taho, wa pay klaro kon duna bay missing kay ang nangaluwas nga mga pasahero nanobra sa natala sa manifesto sa barko.

Mga survivor gipapuyo sa shipping company sa duha ka mga hotel sa Siyudad sa Dipolog samtang hatagan ang matag usa og tag P10,000 nga assistance aron magamit sa ilang pagpauli.

Ang nangamatay giila nga sila si Chloe Labisig, usa ka tuig; Danilo Gomez, 60; ug Ronaldo Heneral, 65.

Wa pa matino kon taga diin ang tulo, apan sa interview sa sibyaanang dyLA, si Labisag ug ang usa sa duha ka mga hamtong, mga pasahero sa Ceres bus, usa sa mga sakyanan nga karga sa barko.

Base sa inisyal nga pamahayag sa Lite Holdings, Inc., mother company sa Danilo Lines, Inc., operator sa barko, kagahapon sa udto, Miyerkules, Agusto 28, aduna kini karga nga 201 ka mga pasahero ug 38 ka mga tripulante.

Sakay usab niini ang rolling cargoes sama sa pito ka ten-wheeler trucks, 13 ka six-wheeler, siyam ka four-wheeler ug lima ka motorbikes.

Engine Room?

Subay niini, ang tigpamaba sa Coast Guard District Central Visayas Lieutenant Junior Grade Michael Encina, nagkanayon nga ang barko nibiya sa pantalan sa Samboan pasado alas 6 sa gabii niadtong Martes.

Sa inisyal nga impormasyon nga ilang nadawat gikan sa Coast Guard Samboan, ang Lite Ferry 16 nituman sa gikinahanglan nga safety certificates.

Nakakuha sab og impormasyon ang PCG 7 sa Coast Guard Dapitan nga ang sunog nagsugod sa engine room sa M/V Lite Ferry 16.

Apan imbestigahon pa kini. Matod sa management sa shipping company nga ang National Bureau of Investigation (NBI) 7 gustong moimbestigar kay sa niaging tuig, duna nay nakuhang mga armas ug bala nga gisuwayan sa pagpalusot sakay sa usa sa ilang mga barko.

Wa nila gisalikway ang posibilidad nga usa usa kini sa mga hinungdan sa sunog.

Usa sa mga pasahero nga si Fred Castro, sa iyang social media post, niingon nga siya ug ubang mga pasahero naluwas mga tulo ngadto sa upat ka oras ang nakalabay sa FastCat fastcraft, apan sila nakaambak na sa dagat.



Dihang ni-post si Castro og video sa Facebook mga alas 7 sa buntag sa Miyerkules, nagkayo pa ang barko. Matod niya, way Coast Guard personnel ang ningluwas kanila.

Gidasunan usab kini ni Allan Barredo, pasahero sa FastCat, nga ningluwas sa ubang mga pasahero.

Ang FastCat gikan sa Dapitan City padung sa Dumaguete City. Ilang nakit-an ang barko mga alas 2 sa kaadlawon sa Miyerkules.

Mga 40 minutos sa ilang paglawig, nakadawat ang fastcraft sa distress call sa barko sa Lite Ferries, matod ni Barredo sa online interview.

Ang Coast Guard nipasabot nganong wa dayoy barko nila nga niabot.

“Immediately upon the receipt of distress ng Coast Guard Dapitan around 11 pm kagabi (Martes), nag-respond na agad sila. It so happened lang siguro yung vessel kasi ng PCG doon, nasa CDO (Cagayan de Oro) pa, so it takes time. Kaya ang ginawa ng Coast Guard Dapitan natin doon, tinap nila ang other shipping doon to respond immediately dun sa maritime incident”, si Encina nagkanayon.

Si Lite Holdings, Inc., chief operating officer Fernando Inting nagkanayon nga giatiman na nila ang mga pasahero nga naluwas.

Duna na sila’y team nga gipadala sa Dipolog branch aron masiguro nga maatiman ang panginahanglanon sa mga pasahero.

“We are still facilitating our passenger and our crew, some are already brought to the hospital for check-up and the rest already check-in in the hotel and some now lately willing to go home and they are asking what can we assist them financially especially all their personal belongings nasama sa barko”, si Inting nagkanayon.

“We instructed our Dipolog Branch to give them P10,000 each passenger to those who want to go home so at least meron silang pamasahe and maybe they can buy temporary clothes so they can go home”, dugang ni Inting.

Ila usab gibutyag nga motabang ang NBI 7 og imbestigar sa panghitabo tungod kay posible nga aduna’y mga armas ug bala nga gipayuhot agi sa barko kay nakasakmit usab sila niadtong nakalabay nga tuig diha palang sa pantalan sa Samboan.

“They want to join the investigation. Maybe there’s a possibility. Alam mo naman going Mindanao yun”, si Inting nagkanayon.

“There were instances before, our security in the vessel intercepted persons bringing firearms and live ammunition. It happened twice, we’re not discounting the possibility,” si Jonathan Imboy, vice-president for operations sa Lite Holdings, Inc.. (dugang taho Sunstar Philippines)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph