NASIKOP sa mga sakop sa Sibonga Police Station ang usa ka nurse lakip ang live-in partner atol sa buy-bust sa ala 1:45 sa hapon niadtong Martes, Agusto 27, sa Barangay Poblacion, lungsod sa Sibonga, Sugbo.
Nadakpan sila si Maria Theresa Simpoo Dillon, 37, kinsa usa ka nars, taga Barangay Sabang, ug Alfonso Caparida Guaves, Jr. alyas Barabas, 41, taga Barangay Poblacion.
Matod ni Police Major Alfredo Kuhay, hepe sa Sibonga Police Station, ang ilang target mao si Barabas tungod naa kini sa ilang watchlist, apan miapil sa transaksiyon ang kapuyo niini nga nars nga gikan sa gawas sa nasud.
Nakuha sa mga dinakpan ang upat ka pakete sa gituohang shabu nga mobalor sa P1,360 ug mga gamit sa pagsuyop sa ilegal nga drugas.
Dugang ni Major Kuhay nga gipa-deport dinhi sa nasud si Dillon human nag positibo sa paggamit sa ilegal nga drugas atol sa gihimong kinalit nga drug test sa iyang employer sa abroad.
Wala motug-an si Major Kuhay kung unsa nga nasud mi abroad si Dillon apan giingong naoambigit kini sa pagpamaligyag shabu bisan naa kini sa gawas sa nasud.
“Gikan nag-abroad nya gipa-deport na didto kay na positive sa drugs, pagbalik dinhi namaliga na silang duha sa iyang live in partner. Apil gyud na siya sa pag transact sa illegal drugs,” matod ni Kuhay.
Kapin sa usa ka semana nga gipanidan sa Sibonga police ang magkapuyo human maka kuhag impormasyon nga nag negosyo kini og shabu sa ilang lugar.
Samtang, managsuon nga gitudlong mamaligyaay og ilegal nga drugas ug ang giila nga ilang kolektor nga usa ka mabdos ang nadakpan sa kapulisan sa siyudad sa Talisay, alas 5:50 sa butag kagahapon, Miyerkules, Agusto 28.
Nahitabo ang buy-bust sa Sitio Tambis, Barangay Pooc, Talisay.
Ang mga nasikop giila nga si Arvin Ryan Bacalan Abendan, 33, kinsa subject sa buy-bust ug ang magulang niini nga si Alexis Rey Bacalan Abendan, 36.
Wala usab makaipsot pa ang lima ka bulan nga mabdos, nga giila nga si Marlyn Zafra, 22, kinsa giingong’ maoy tigkolekta sa ilang halin sa ilegal nga drugas.
Ang mga dinakpan molupyo ra usab sa dapit.
Matod ni Police Captain Nazarino Emia, deputy chief sa Talisay City Police Station nga tuyo nila mao si Arvin, human nga nakadawat og mga taho nga nibalik sa ginadili nga patigayon.
Si Arvin ang giingon nga ni-surrender na sa tuig 2016, apan nasuta nga nibalik kini, human nagpositibo sa gihimo nga pipila ka semana nga surveillance.
Samtang, si Zafra kinsa niangkon nga bisan kon mabdos, niapil sa maong ilegal nga patigayon, isip maoy tigkolekta sa bayad gikan sa mga tawo nga namalit og drugas kanila.
Giangkon sa babaye nga nahimo niya kini, alang unta sa iyang pagpanganak ug nagbasol man, apan uwahi na, lakip na kini sa nasikop.
Nasakmit gikan kanila ang ilegal nga drugas nga mobalor og P68,952 ug mga drug paraphernalia.
Apan ang hinigugma ni Zafra kinsa nidali sa pagtuyo sa lugar ang igo wala una nakatuo kay matud pa wala kahibalo sa gihimo sa hinigugma.
Igo na lang kini sa paggakos ug pagpakaon sa dinakpang’ hinigugma.
Dugang ni Emia nga si Zafra ang graduate unta sa kursong Edukasyon ug mokuha na unta sa pasulit alang sa Licensure Exam for Teacher (LET). (AYB & FMD)