NAHIMONG dako nga isyu sa nasud ang pagkalakip sa pangalan ni kanhi Calauan Mayor Antonio Sanchez sa listahan sa 10,000 ka mga piniriso nga mahatagan og kagawasan tungod sa Republic Act 10592 ang GCTA o Good Conduct Time Allowance.
Si Sanchez nalambigit sa kaso sa paglugos ug pagpatay kang Eilen Sarmenta ug iyang uyab nga si Allan Gomez niadtong June 18, 1993.
Human sa 16 ka bulan nga pagtaral sa kaso, Marso 14, 1995 mipakanaog sa hukom si Judge Harriet Demetriou sa Pasig diin gisentensyahan si Sanchez nga mabilanggo sa pito ka termino sa reclusion perpetua diin 40 ka tuig ang matag termino sa kinatibuk-an dunay kadugayon nga 280 ka tuig nga pagkabilanggo.
Tuig 1999, bulan sa Enero 25, ang Supreme Court mipakanaog og laing hukom nga double life term nga pagkabilanggo ni Sanchez sa laing kaso nga nasang-at sa hukmanan.
Ang kaso ni Sanchez gibuhatan og pelikula ug gisalida sa mga senihan niadtong tuig 1994 gititulohan kini og "Humanda ka Mayor, Bahala na ang Diyos" sa Regal Film ug Golden Lion Production nga gipangunahan ni Aga Muhlach, Kris Aquino ug Dick Israel ubos sa direction ni Carlo Caparas. Sa maong salida, ang pangalan sa mayor mao si Mayor Miguel Beltran.
Ubos sa programa sa GCTA, kwalipikado kuno ai Sanchez nga makagawas human misilbi sa 20-anyos sulod sa New Bilibid sa Munti kay nagbag-o na kuno sa iyang kinabuhi.
Mamahimong na-impluwensiyahan ni Sanchez ang mga opisyal sa bilanggoan nga miingon nga nagbag-o na o nausab na si Sanchez, busa pwede na mapagawas ug dili na kinahanglan kumpletuhon ang 360 ka tuig nga pagka bilanggo. Tinuod ba nga nag bag-o na siya sulod sa bilangguan?
Sa selda ni Sanchez, dunay nakuha nga mga pinutos nga shabu sa gipahigayon nga pagronda nga gipahigayon sa otoridad. Wala sab gibayaran ni Sanchez ang mga ginikanan ni Sarmenta ug Gomez sa kantidad nga gitakda sa korte gawas sa iyang pagkabilanggo.
Sa interbyu kang Sanchez sa telebisyon, iyang gilimod nga duna siyay kalabutan sa pagkamatay ni Sarmenta ug Gomez, hinungdan nga wala siyay angay pangayoan og pasaylo. Dili sab kuno siya mobayad sa sala nga wala siyay kalabutan.
Asa man ang kabag-uhan nga gina-ingon sa mga opisyal sa New Bilibid nga ilang gibasihan sa paglakip kang Sanchez sa angayan hatagan og pasaylo?
Makaduda nga dunay hukos-pukos sa mga ilado nga mga personahe sa katilingban nga nagapakita sa kahuyang sa sistema sa hustisya sa atong nasud.
Maayo nalang kay gipugngan ni President Rodrigo Duterte ang pagbuhi kang Sanchez nga unta niadtong Agusto 20 pa usa na siya ka gawasnon kay kalimtan nalang ang hukom nga 360 ka tuig nga pagkabilanggo tungod sa iyang sala nga nabuhat.
Sa yano nga pagsabot, usa kini ka babag nga mahimong sayon ang pagbalik sa silot kamatayon nga ginahikay pagbalik sa mga magbababalod aron banhawon ug ipahamtang sa mga mahukman nga sad-an.