MAKAHULOGANON ang fluvial parade diin usa sa mga dakong kalihokan sa siyudad atol sa kapistahan ni St. Augustine sa dakbayan sa Cagayan de Oro.
Anaa sa 30 ka mga participante ang niuban sa maong parada gikan sa Macabalan paingon sa Duaw Park agi sa Cagayan de Oro river sama sa Knights of Columbus (St. Peter Macabalan Parish), Safer river, City Tourism, Barangay 1, Barangay Macabalan, Nuestra Señora Virgin Del Rosario Parish Consolacion, Puntod Fisherfolks, Barangay Carmen, San Nicolas de Tolentino, Barangay Balulang, Our Lady of Fatima Parish, Barangay Gusa, Barangay 10, New Oro Print, Barangay 7 ug Barangay Bonbon.
Gibutyag ni Dr. Rosalina Huerbana, Executive Director sa Safer River Life Saver Inc. sa Liceo de Cagayan University ug chairperson sa fluvial parade kauban usab ang city government ug Archdiocese sa Cagayan de Oro nga makahuloganon kining maong fluvial parade.
“Atong gihatagan og dako kaayo nga bili ang atong kinaiyahan ang Cagayan de Oro river, diin usa sa legends of Cagayan de Oro City, ikaduha atong pagsaulog karon sa kapistahan tulo ka mga icons ang kauban nato sa fluvial, ang una nga icon ni Sr. San Agustine, ikaduha ang kang Santa Monica, inahan ni Sr. San Agustine, ang Birhen sa Kota ikatulo nga icon atong gipasalamatan usab kay dako kaayo na siya og kalambigitan sa atong suba,” matud ni Huerbana.
Giingong ang Birhen sa Kota dunay dako kaayo nga kalambigitan sa suba ug dunay dakong kasaysayan ang Cagayan de Oro river kung nganong dunay Birhen sa Kota sa siyudad. Duna’y orihinal usab nga imahen ang simbahan hinungdan nga ikatulo kini pasalamatan pinaagi sa pagsaulog.
Giingong ang Birhen sa Kota ang nakita sa daplin sa Cagayan de Oro River diin nadugmok ang imahen ug ang orihinal anaa sa Cathedral.
Gidugang pa nga sa wala pa ang fluvial parade dunay misa sa Calacala tungod na usab sa mga nabiktima sa Sendong gitoohang mga patay nga lawas nga wala pa nakuha ug human sa misa dunay floral offering isip halad sa mga nangamatay.
Human usab gipanalanginan ang mga icon lakip na ang mga bangka ug alang sa mga patay.
Anaa sa 31 ka mga Barangay ang mga partisipante ug mga anaa sa 20 ka mga rubber boats lakip na ang mga Philippine Coast Guard, Maritime ug City Disaster Risk Reduction Management Department hinungdan nga mokabat kini ngadto sa 50 ka mga bangka diha sa suba.