Nalzaro: Krimen na basta condom tangtangon

HUMAN sa hinanggaw nga balaodnon ni Lapu-Lapu City Congresswoman Paz Radaza nga dili na ipatawag og lapu-lapu ang isda nga lapu-lapu kon dili pugapo na kay dako kunong insulto sa atong bayani nga si Lapu-Lapu, laing hinanggaw nga balaudnon ang gisang-at karon sa ubos Balay-balauranan. Si AKO Bicol partylist Representative Alfredo Garbin ug Elizalde Co misang-at sa House Bill 3957 nga mamahimong “sexual assault” o gani mahulog nga rape kon mag-esmiringhoy ang duha ka binuhat nga tuyuon og tangtang ang condom.

Ubos sa maong balaodnon, tawgon kini og “stealthing” kon ang usa ka tawo labi pa ang lalaki molingla sa iyang sex partner nga nagsul-ob siya og condom apan tuyuon kini og tantang atol sa ilang pagtagay sa kalipay. Puwede sab nga mokiha ang lalaki kon ang susamang insidente mahitabo kaniya. Siguro para sa mga mahuyang. Kon tuyuon og tangtang, puwedeng mokiha gani og rape.

Ang tumong nila ni Garbin ug Co nga malikayan ang pagkuyanap sa sexually transmitted diseases sama sa Aids. Ug kon mamahimo na unyang balaod, nagtangag kini og silot nga kriminal. Kon ang usa ka tawo masutang sad-an og ‘steathing’ mag-atubang og 17 ka tuig nga pagkabilanggo ug multa nga P700,000. Kon ang akusado makapamabdos sa iyang partner, 20 ngadto sa 40 ka tuig nga pagkabilanggo ang silot ug multa nga usa ngadto sa lima ka milyon ka pesos.

Bisan kon ang babaye nasayod na nga gitangtang ang condom apan ang iyang partner, nagpadayon gihapon, puwedeng mopasaka na siya og kasong rape. Pastilan no, wala na gyuy laing nahuna-hunaan nga balaod kining ubang mga magbabalaod? Puwede ba kining ma-implementar? Kinsa may ang mosaksi?

Kanang condom moburot na kon dako usab ang giputos. Apan inig kuyos sa gipustan, matangtang ra usab kana og iya. Ang ubang babaye masuko magcondom ang ilang partner kay wa kunoy lami. Sa pagsugod pa lang, dako kaayo ang kang Tarzan morag botelya sa softdrink. Apan inig human, morag botelya gihapon pero botelya nalang sa White Flower. (bobbygnalzaro@gmail.com)