SUPERBALITA CEBU

Sugilanon: Tambal sa sapot ni Nova

ALAS nuybe sa gabii. Nagtupad na paghigda sa ilang kama ang magtiayong Celso, 62, ug Nova, 59. Mao ni unang higayon nga nagtupad silag higda human sa milabayng lima ka tuig. Wa sila magbuwag. Nag-uban gihapon sila sa usa ka lawak. Naglain lag higda si Celso diha sa kutson sa sawog. Si Nova maoy naa sa kama. Wa pa sila magduka, kay daghan silang gihunahuna nga igsusulti sa usag usa. Morag nahanaw na ang ilang gugma sa usag usa, kay sulod sa duha ka semana sige silang nag-away.

Sila na man lang ang nahibilin nga nagpuyo sa ilang balay. Buntag, udto, hapon ug gabii, gipul-an na silang magtinan-away sa ilang mga dagway nga nangunot na. Ug nangapo na sila. Hinuon, talagsa na lang moduaw nila ang ilang duha ka anak, sila Myrna ug Maricor. Nangaminyo na sila ug nanaglain nag puyo. Apan mitambag sila pinaagi sa teks ug tawag sa selpon, nga mangita silag paagi nga malipay gihapon sila sa ilang panag-ipon. Misugyot sila nga angay hinumduman nila ang ilang relasyon sa bag-o pa silang minyo.

Si Celso usa ka CPA; si Nova maestra. Puro sila himasag mga libro. Nagsabot sila nga estoryahan nila ang ilang problema; pangitaan og sulusyon. Tibuok adlaw ganiha mibisita kanila ang ilang mga anak. Gi-patch up sila. Gipapangayog pasaylo sa usag usa.

“Ngil-ad kaayo, Pa, Ma, nga kon wa mo mangapo, wa mo mag-away-away,” ni Myrna.

“Bitaw, Pa, Ma! Pagsinabtanay lang god mo. Mga tiguwang na baya mo,” ni Maricor.

Katloan ug unom na silang minyo. Nagdulong na sila sa ika-37 nga anibersaryo sa ilang kasal.

“Pwede na ta mag-estorya?” ni Celso nga mibuak sa kahilom tali nilang duha. Hugong ra sa andar sa air-con ang ilang madungog.

“O, pero ayaw na paningka. Magprangkahay ta, pero way singkahay,” ni Nova.

“Okey, Pero kasagaran, ikaw may unang maningka. Saputon na man kaayo ka,” ni Celso.

“Mao lagi. Sukad nga wa na tay dug-dug, sige na lang kong gisapot,” tug-an ni Nova.

“Pasayloa lang ko, Nov. Unsaong naapektohan man kos dayabites.”

“Wa koy mahimo. Moingon man lang ka nga may limitasyon ang kakayahan sa lawas sa tawo. Pero ang akong lawas nagkinahanglan pa man gyud...” ni Nova.

“Nakabasa bitaw kog libro nga nag-ingon, nga ang asawang saputon kulang sa sex.” ni Celso.

“Sakto gyud ka. Makapa-relax ang climax sa sex.” ni Nova.

“Therapy gyud diay ang sex. Stress remover. Gisapot ka tungod sa stress.”

“Unsa may ikatambal nimo sa akong sapot?” ni Nova.

“Aylag kasuko, ha! Ang komunikasyon importante sa magtiayon.”

“Oo. Kinahanglan way sekreto tali nato. Sultianay ta sa tanang tinuod sa atong panginahanglan,” ni Nova.

“Mangutana lang ko. Nakauyab ka bag tomboy sa una?” ni Celso. “Unsa god nang pangutanaha?” ni Nova nga pinasingka. “Tubaga lang ko,” ni Celso.

“Wa gyud tawon. Ikatulo kang uyab nako. Apan ikaw ang nakakum-os sa akong gihay. Ang akong duha ka ‘ex’ puro man long-distance love affair. Nganong naabot man ta sa tomboy?” ni Nova.

“Duna kay amiga nga nakauyab og tomboy?” ni Celso. “Duna!” ni Nova.

“Nasuginlan ba ka nila kon unsay buhaton sa tomboy kon mag-love-making sila?”

“Unsay buot mong ipasabot?” ni Nova. “Mag-tinomboy na lang ko!” ni Celso.

“Na hala god!” ni Nova nga miagik-ik.Nangahilom sila. Unya nabati ang ilang mga hinangos.

Pagka ugma mapahiyumon na ang magtiayon. Napukaw na ang nagduka nilang gugma sa usag usa. Mibalik ang kainit ug kamabulukon sa ilang pagminahalay.

PAG-ABOT sa ika-37 nga sumad sa ilang kasal nagpinirmahay silag dokumento. Ilang basahon kada dayon nilang katulog. Ang unod sa dokumento nag-ingon:

CELSO: I love you. You love me. NOVA: We love each other. BOTH: We want each other’s happiness. CELSO: I give you pleasure and happiness. NOVA: I also give you pleasure and happiness. BOTH: We both give each other pleasure and happiness. We enjoy each other’s love. We must do these as often as we can. (Pirmado nilang Celso ug Nova). (KATAPUSAN)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph