ANG Cebu City Sinulog Governing Board (CCSGB) nga giumol pinaagi sa executive order ni Mayor Edgardo Labella mao ang pagpagaan sa trabaho, responsibilidad ug pag-sihag sa tanang kalihukan sa Sinulog Foundation Inc (SF), lakip na ang pagkolekta ug paggasto sa kwarta gikan ug para sa Sinulog Festival.
Kini ang gipadayag ni Labella, chairperson sa CCSGB. Ang pagtukod sa board gikwestyon ni Vice Mayor Michael Rama, kinsa napili nga chairman sa ika-15 ka higayon sa SFI atol sa eleksyon niadtong Agusto 2.
Si Labella nagkanayon nga ang CCSGB maoy magsilbi nga representante sa Cebu City Government pagsiguro nga malampuson ug malinawon ang umaabot nga Sinulog Festival 2020 ug kaabag sa SFI, usa ka non-government organization.
“As mayor, I have this duty to see to it that all these concerns will be addressed and I am even glad that the vice mayor (Rama) is the chairman of SFI so that we can work well together,” padayag ni Labella sa usa ka press conference.
Lakip sa prayoridad sa board mao ang traffic, peace and order, disaster management ug uban pa.
Giklaro ni Labella nga apil si Rama sa CCSGB isip chairman sa SFI. Lima sa ilang trustees sa board mahimong mga miyembro sa governing board.
Aduna say laing walo ka mga miyembro nga i-appoint sa mayor nga apil sa 24 ka mga sakop sa board.
Si Rama gusto sab nga makighinabi kang Labella, apan iya unang tagbuon ang SFI officials.
“ I hope I can talk to him (Rama) over this so that there will be no misunderstanding and I don’t want that to happen because after all, we have the same purpose for a very successful Sinulog,” dugang sa mayor.
Si Labella nagkanayon nga ang Sinulog gipahigayon sa Dakbayan sa Sugbo.
Isip mayor, aduna siyay responsibilidad hinungdan nga iyang giumol ang CCSGB sanglit kumpleto kini sa tanang mga ahensiya nga adunay dakong papel para sa kalampusan sa tinuig nga kalihukan sa siyudad.
Gobernador mibisita
Personal nga gipasalamatan ni Gobernador Gwendolyn Garcia si Labella gumikan sa pagpagamit sa Cebu City Government sa ilang pasilidad nga dako og gikatampo sa kalampusan sa Pasigarbo 2019 human sa unom ka tuig nga pagkawala.
Si Labella nipasalig ni Garcia nga kadto maoy sinugdanan sa Pasigarbo nga ipahigayon sa Cebu City.
Iyang hangpon kon pilion sa gobernadora ang Cebu City sa sunod tuig nga Pasigarbo ang Cebu City, kinsa nagdala sa mga talent ug festival gikan sa lainlaing mga lungsod ug siyudad sa lalawigan.
Si Garcia, sa iyang bahin, niingon nga ang Pasigarbo sa Kapitolyo maoy mo-compliment sa Sinulog Festival sa Cebu City diin ubay-ubay sa mga delegasyon sa Pasigarbo ang mo-apil sa Sinulog matag tuig.
Ang gobernador nihatag og token sa mayor nga gikan sa lainlaing lungsod lakip na ang litson sa Talisay City samtang ni Labella nitunol og mga buwak ngadto kang Garcia uban sa miniature sa Basilica ug Magellans cross.