KONGRESISTA Raul del Mar sa Cebu City north district gusto nga mapasabot sa Department of Transportation (DoTr) ug National Economic Development Authority (Neda) ang ilang pagpamubo sa rota sa Bus Rapid Transit (BRT) gikan sa 23 kilometros ngadto na lang sa 13 kilometros.
Si Del Mar nipalanog sa iyang privilege speech atol sa regular session sa hawanan sa House of Representatives para mapaabot ug mahatagan og alibyo ang nasinating kahuot sa trapiko sa Cebu pinaagi sa implementasyon sa BRT.
Si Cebu City Mayor Edgardo Labella, sa iyang bahin, niawhag ngadto sa DOTr nga ipatuman na ang BRT aron usab di na magpas-an sa commitment fees ang gobyerno, diin sa nilabay nga lima ka tuig, nawagtangan na og P23 milyones ang national government.
Ang World Bank, Agence Francaise de Development ug International Bank for Reconstruction and Development, maoy nipahuwam og kwarta sa Pilipinas para sa maong proyekto.
Kini nihatag og lugway nga mapatuman ang proyekto hangtod sa 2021.
Si Del Mar niawhag sa DOTr nga i-reconsider ang ilang nahaunang desisyon ug mosubay sila sa unang rota gikan sa Bulacao paingon sa Talamban nga adunay 23 kilometros nga gilay-on sanglit sa maong lugar nagdasok ang mga pasahero.
Sa 13 kilometros nga maoy bag-ong rota nga subayon, nanukad kini sa South Road Properties paingon sa IT Park.
Gihulagway kini ni del Mar nga pulos commercial areas ang maagian ug way residential nga dapit.
Ang batikan nga kongresista gusto nga maimbitar ang kadagkoan DOTr ug Neda sa House of Representative aron mapasabot kon nganong ilang giputol ang orihinal nga rota.
Girekomendar usab niya sa DOTr nga ipatuman ang balaudnon para sa katukoran sa LRT o MRT sa Cebu City ug Metro Cebu para sa hinanali nga kasulbaran sa kahuot sa dagan sa mga sakyanan nga maoy hinungdan sa pagka-late sa mga trabahante sa ilang trabaho.