ANDAM na ang tanan alang sa pagsugod sa Season 19 sa Cebu Schools Athletic Foundation Inc. (Cesafi) nga gilangkuban og 16 ka sporting events ug 13 ka academic ug cultural events.
Sa opisyal nga paglusad sa Cesafi Season 19 kagahapon sa Marco Polo Plaza Hotel sa Nivel Hills, nagkanayon si commissioner Felix Tiukinhoy Jr. nga pahimuslan nila og insakto ang social media aron mapalapdan ang maabot sa kompetisyon.
Ning maong lakang, gipasigarbo ni Tiukinhoy nga giporma nila ang Cesafi Live nga gilangkuban og 133 ka volunteer students gikan sa nagkalainlaing tunghaan aron maoy mopadagan sa nagkadaiyang aspeto sa social media.
“With Cesafi LIVE, we’ve been able include more students in the events not merely as spectators and fans, but as actual organizers and managers of various committees that make Cesafi a success,” opisyal nga pamahayag ni Tiukinhoy.
Ang Season 19 pormal nga sugdan karong Agusto 31 sa Cebu Coliseum pinaagi sa naandang grandiyusong opening program nga dugangan og kolor sa pagpili sa 2019 Miss Cesafi alang sa high school ug college divisions.
Human niini, mosugod na ang kombati sa basketball. Ang ubang events sunodsunod nga sugdan sugod karong Septiyembre.
“In the past few years, we’ve tried to make Cesafi a wider concern among all our member schools,” batbat ni Cesafi ug CIT-U president Bernard Nicolas E. Villamor.
“We commend our students, athletes and non-athletes alike, their coaches, and other mentors who have been hard at work to make Season 19 even bigger and better than the past seasons. Basta Cesafi, estudyante!”
Kabahin sa basketball, giangkon ni college defending champion UV Green Lancers coach Gary Cortes nga dili sayon ang ilang misyon ning tuiga nga mao ang paglangkat sa talagsaong four-peat.
“With regards sa among preparation sa Cesafi, nag-dream gyud mi anang four-peat. For sure, ang tanang teams will compete at their best maong kinahanglang mangandam mi’g insakto. Sayon estoryahon pero lisod buhaton,” matod ni Cortes.
Sa tan-aw ni Southwestern University (SWU)-Phinma Cobras coach Mike Reyes, kining tuiga mao ang labing balanse kon hisgutan ang kabahin sa kalig-on sa puwersa sa partisipanteng teams.
“In my 15 years in Cesafi, ngayon yatang taon na ito ang pinaka-balance. Walang game na sure win,” asoy ni Reyes.
Ang Cobras maoy usa sa gikonsiderar nga labing inilog sa torneyo human nila gilangkat ang titulo sa Partner’s Cup pinaagi sa pagbuntog sa Green Lancers sulod sa duha ka sunodsunod nga mga higayon sa finals series. (ESL)