MINNESOTA, USA -- Tulo ka estilo ang ang ipagawas nga diskarte ni General Santos City-based apan Polomolok, South Cotabato-native fighter Reymart Grande “Assassin” Gaballo dihang ikabagat niya ibabaw sa boxing ring si Colombian knockout artist Yeison Vargas.
Ang power puncher nga si Gaballo miangkon sa Sunstar Superbalita Cebu nga aduna siyay kaugalingon nga estilo apan posibleng makita sa mga boxing fans nga iyang lamasan sa estilo gikan sa iyang duha ka gidayeg nga mga boxing legends Pacquiao ug Mayweather.
“Number one gyud nako nga idolo Manny Pacquiao unya number two Floyd Mayweather Jr.,” mensahe ni Gaballo ning tigbalita.
Si Gaballo (21-0, 18KO) nga gikan sa Mindanao mosalida batok ni Vargas (17-1, 12KO) alang sa 10-round non-title sa Bantamweight division sa Minneapolis-Armory sa Land of Ten Thousand Lakes (Minnesota State).
Matod ni Gaballo nga gisayangan siya sa kahigayonan sanglit undercard unta siya sa Pacquiao vs Keith Thurman niadtong miaging buwan sa Las Vegas apan gikanselar human siya nagisian atol sa ensayo.
“Naay plano ang Ginoo nako busa God bless nalang namong duha Yeison (Vargas), pasalamat ko sa akong mga fans, SanMan team ug Moro team,” panapos ni Gaballo ang former WBA interim bantamweight champion.
Gikan sa SanMan Gym sa GenSan nagpadayon si Gaballo pag training ug sparring sa California State hangtod nibalhin pag ensayo sa Miami, Florida diin iyang naka-sparring si 2016 Olympian boxer ug two-time Gold medalist sa World Championship si Cuban Joahnys Argilagos.
Huwebes sa buntag ang press conference samtang Biyernes sa udto ang weigh-in. Sa Sabado, Agusto 31 alas 5 sa hapon Central Time ang fight (Dominggo alas 6 sa buntag Philippine time) sugdan nga isalida sa Fox Television.
Ang Gaballo vs Vargas usa lang sa undercard nila ni Cuban Erislandy Lara batok Mexican Ramon Alvarez alang sa bakanteng bakus nga WBA Super Welterweight 154-lb. division. (Daniel Quindao Guden, US Correspondent)