ANAK sa kapitan sa Barangay Cogon Ramos sa siyudad sa Sugbo ang nasikop sa mga sakop sa Abellana Police Station 2 human nga nang isyu og numero sa ilegal nga swertres sa alas 10:30 kagahapon sa buntag, Huwebes, Agusto 29.
Ang nadakpan mao si Junie Mar Quiros Durano, 31, nga nagpuyo sa dalan R. Ramos sa Sitio Upper, Barangay Cogon Ramos.
Matod ni Police Major Eduardo Sanchez, hepe sa Abellana Police Station, nihimog pagpatrolya ang iyang mga sakop.
Sa pag-agi niini sa F. Ramos, ilang nakit-an in plain view ang usa ka lalake nga nag isyu stub sa ilegal swertres nga maoy hinungdan nga ila dayon kining gisikop.
Nakuha sa dinakpan ang mga stub nga adunay carbon paper ug adunay mga sinuwat nga tulo ka kombinasyon sa numero.
Usa ka ballpen ug kwarta nga moabot ngadto sa P320 nga gipusta sa iyang kustomer.
Dugang ni Sanchez nga sukad mimando ang Police Regional Office (PRO) 7 nga hingusgan ang pagpanakop sa mga nalambigit sa illegal numbers game ila na kining gipatuman bisan kinsa pa ang maligsang tawo sa ilang hugot nga operasyon.
Gipasakaan nag kasong kalapasan sa Republic Act 9287 kagahapon, Huwebes, Agusto 29.
Lakip usab sa gipang-monitor karon sa kapulisan ang mga small town lottery nga una nang gipabalik pag-operate, apan kadto lamang operator nga adunay pagtugot sa Philippine Charity Sweepstakes Office (PCSO).
Gisuspenso og kadali ang operasyon sa lotto lakip small town lottery tungod sa daghang reklamo.