MAS andam sa tanang aspeto isip basketbolista ang Sugboanong higante nga si JuneMar Fajardo sa iyang paghamag og balik sa world stage kauban ang Gilas Pilipinas nga mokampanya sa 2019 FIBA Basketball World Cup nga sugdan ugma sa China.
Sa una niyang pagrepresentar sa Pilipinas sa 2014 nga edisyon ning maong prestihiyusong kometisyon, si Fajardo igo pa lang nakahuman sa premiro niyang season sa Philippine Basketball Association (PBA) diin siya ang napiling MVP.
Nag-edad pa lang siya’g 24 niadtong higayuna ug limitado ra ang iyang oras sulod sa korte gumikan kay gihimo ra siyang tigrelibo ni naturalized player Andray Blatche.
Apan bisan pa niini, nakapakita og saktong katakos ang produkto sa University of Cebu (UC) Webmasters hilabi na sa duwa batok sa Senegal diin mirehistro siya og 15 puntos ug siyam ka rebounds.
Gipamatud-an sa lumad nga taga lungsod sa Pinamungajan, Cebu nga aduna siya’y ikasukol batok sa ubang mga higante gikan sa nagkadaiyang suok sa kalibutan.
Ning higayuna, ang 6”10 nga si Fajardo mohamag og balik sa kompetisyon nga mas masaligon, mas taas og kasinatian, mas kamao ug mas isog nga makigbinanggaay sa iyang mga kaparang.
Labing seguro, dili na siya mahimo lang nga tigrelibo ni Blatche ubos sa paggiya ni coach Yeng Guiao.
Gitataw sa gitawag og “The Kraken” nga iyang buhaton ang tanan niyang makaya aron makatabang sa Gilas Pilipinas.
“Basta, tiwala lang sa sarili. Tiwala lang sa teammates mo, tiwala lang kila coach,” matod ni Fajardo sa interbyu sa www.abs-cbnnews.com.
“Tiwala lang sa team na maa-achieve natin ‘yung goal natin. Kailangan natin i-boost ‘yung sarili natin, kasi nga kung ‘di tayo magtitiwala sa sarili natin, sino pa ang magtitiwala sa atin, ‘di ba? So magsisimula ‘yan sa sarili natin. So bibigay natin ‘yung best natin.”
Giangkon ni Fajardo nga makonsiderar gihapon siya nga underdog batok sa bigmen sa ubang mga nasod apan andam siyang makigparang kutob sa iyang mahimo.
Sa group stage, ikasangka sa Gilas Pilipinas ang Italy, Serbia ug Angola nga pulos adunay dekalidad nga mga sentro hilabi na ang Serbia diin nahisakop si Denver Nuggets center Nikola Jokic, usa ka All-Star sa National Basketball Association (NBA).
“Sobrang challenging ‘yun para sa akin kasi nga ang lalaki na ng mga kalaban ko doon, mga 7-footer na ‘yun eh,” pasabot ni Fajardo.
“So ayun, ‘yun nga, wala namang mawawala sa akin pero marami akong mage-gain na experience doon pag nakalaban ko sila. Pero ayun, gagawin ko talaga ‘yung best ko, ibibigay ko ‘yung best ko para makapag-contribute ako sa team.”
Gawas kang Fajardo, ang ubang mga sakop sa Gilas Pilipinas mao sila si Blatche, Gabe Norwood, Paul Lee, Japeth Aguilar, Roger Pogoy, Mark Barroca, Raymund Almazan, Tory Rosario, ang bag-o lang nakabalik nga si Keifer Ravena ug ang duha ka PBA rookies nga sila si No.1 pick CJ Perez ug No.3 pick Robert Bolick. (ESL)