MAPASIGARBUON si Muay Thai Association of the Philippines-Cebu president Benigno “Master Ekin” Caniga nga nakahatag na sab og dungog sa dakbayan sa Sugbo ang ilang grupo human kini nakahakot og 11 ka mga medalya sa bag-uhay lang nahuman nga Batang Pinoy sa Palawan.
Ang Cebu City Muay Thai team nakahakot og tulo ka gold medals, lima ka silver medals ug tulo ka bronze medals ning higayuna.
“Happy ko karon sa ilang performance. Kada tuig naa gyud improvement unya ang atong bag-ong athletes, bisan maparisan sila og mga advance pero mosukol gyud. Na-satisfy ko. Ang gold medalists nato last year atong na-maintain,” matod ni Master Ekin, kinsa maoy founder sa Yan-Yan Ardigma Cebu.
Sa miaging tuig, ang team nakakuha sab og 11 ka mga medalya nga gibahin sa tulo ka mga gold, upat ka mga silver ug upat sab ka mga bronze.
“Impressive gyud ang atong athletes nga gikan sa atong grassroots program. Wala ko mag-expect nga makapakita og kaisog sama sa ilang gipakita kay first time pa gud nila nga mo-compete,” dugang ni Master Ekin.
Ang mga nakahatag og gold medals sa Cebu City mao sila si Jemarie Josh Ybañez sa 14-15 years old 51KG category, Zion Alexander Melecio (14-15 years old 57KG) ug Buen Algono V (12-13 years old 32KG).
Ang silver medal winners mao sila si Prime Jedrek Melocoton (14-15 63.5KG), Showne Michael Suan (12-13 years old 32 KG), John Ronald Puso (14-15 years old 42KG), Dave Cortez (14-15 years old 36KG) ug John Francis Almario (12-13 years old 52KG).
Minglanbkat og bronze medals mao sila si Renwel Mark Alforque (12-13 years old 54KG), Hans Vincent Concepcion (10-11 years old 34KG) ug Edgar Caburnay Jr. (14-15 years old 36KG). (ESL)