KINSA man nang dalaga nga naa sa ilang Nang Lekong magpuyo, Bay?” ni Dodong samtang nakig-inom og lapad sa iyang barkadang si Tekloy sa tindahan ni Vita-Lucio nianang hapuna.
“A, si Liza na, Bay, pag-umangkon ni Nang Lekong. Mianhi kuno siya sa ato aron mangitag trabaho. Gradwado man god siya sa hayskol ug kahibawo na ka, pinangita man kaayo ang ingon kaniya sa mga kompaniya sa MEPZA.”
“Taga diin man diay na siya?” ni Dodong nga mibutang sa baso human moyarok sa bino.
“Taga Dumanjug ug kay lisod man pangitaon ang trabaho didto maong ania siya sa ato manimpalad,” patin-aw ni Tekloy nga mipunit sa baso ug giipisan na usab og alak nga sinaktan na daan og sopdrink. “Ngano man, kursonada ka niya?”
“Unta. Wa pa ba kaha na siyay hinigugma, no?”
“Wa pa tingali kay wa man ko makabati nga naghisgot siyang dunay uyab sukad siya motipon sa ilang Nang Lekong.” Gitungab ni Tekloy ang baso ug gibutang sa talad. “Suwayi og panguyab, basin sugton ka.”
Usa ka drug addict si Dodong. Taudtaod na siya ning maong bisyo. Walay adlaw nga di siya mahiuling sabog. Apan giagwanta lang kini Nang Bebing nga iyang inahan. Wala lang usab maninagad niini ang iyang Papa Masyong kay mosukol man kon badlungon. Nahadlok si Noy Masyong nga magkaaway silang amahan ug anak.
Tungod sa mao niyang bisyo, mihugo ang lawas ni Dodong. Kanunay siyang maymayan ni Nang Bebing nga mobiya na sa iyang bisyo sa druga ug ilimnon apan wa manumbaling. Busa igo na lang si Nang Bebing sa pag-ampo sa Kahitas-an nga unta mausab na ang iyang kamaguwangang anak. Ang mga manghod ni Dodong pulos na minyo. Dili man unta maingon nga bati siyag nawong. Nabiyaan sa tren si Dodong tungod sa dili mabangbang niyang bisyo.
USA niana ka gabii namatikdan ni Nang Bebing nga nagpaguwapo ang iyang pinanggang anak. Dugay kining naukang sa salamin. Nasingo niya ang kahumot sa gidigo niining agwa.
“Asa ka man, Dong?”
“A, mamisita ko sa ilang Nang Lekong,” pintok niyang tubag.
“Ha, mamisita? Nagmilagro man. Kinsa may imong bisitahon?”
“Si Liza.”
“Sugton ka kaha nga bisyuso ka mang dako?”
“Sulayan ko lang.”
Apan paghimuntog ni Dodong sa tugkaran nilang Nang Lekong, iyang nabatian si Liza nga may gikasulti. Nagpahipi siya sa mga tanom ug naniid.
“Aduna ka na bay hinigugma, Liza?” tingog ni Nang Lekong ang iyang nabati.
“Wa pa, Tiya. Ngano man diay?”
“Nakabantay man god ko nga nagpunay og tan-aw nimo si Dodong. Ingon sa may gusto nimo ang kamaguwangan ni Nang Bebing nga usa ka adik.”
“Aw, kon siya na lang, Tiya, wa gyud siyay mapaabot nako. Gawas tingali kon biyaan niya ang iyang mga bisyo.”
Tataw nga nadungog ni Dodong ang gipamulong ni Liza hinungdang wala na lang siya mopadayon sa iyang tuyo. Ug pagpanglabay sa mga adlaw ang mga lumulupyo sa barangay Looc, ilabi na kang Nang Bebing, nakamatikod og kausaban sa mga lihok ni Dodong. Molihok na kini sa mga lihukon sa balay sama sa pagpanglaba, pagpanglimpyo, pagpamugha og kahoy, pagsag-ob og tubig ug labaw sa tanan, gitalikdan na niini ang iyang mga bisyo.
(KATAPUSAN)