TUNGOD kay Coco Martin na man ang akong peg (probinsyano) mga upat na ka tuig human ko niretiro sa Kapitolyo, nituyo lang gyud ko pagbiyahe sa syudad sa Sugbo aron mosaksi sa Pasigarbo sa Sugbo, ang labing dakong proyekto ni Gob. Gwen Garcia kalabot sa kultura ug kabilin.
Tuyo pod nako nga magpatupi ug magpakolor sa buhok sa salon ni Jun Esma sa Banilad, magpamasahe sa Body ‘n Sole sa Raintree Mall ug motan-aw og duha gyud ka pelikula: Hello, Love, Goodbye ug Just A Stranger.
Naunsa ba nga nabiktima man hinoon ko sa hilanat pagka Dominggo. Pagan ang tanang plano.
•••
Mga pahalipay sa Carcar City sa pagdaug sa grand prize sa ritual showdown, streetdancing, festival jingle ug best in costume. Si Marla Alforque usab ang napiling Pasigarbo Festival Queen pagka Biyernes.
Harus kamunggay! Mga pahalipay usab sa Madridejos, Talisay City, Alcoy, Consolacion, Argao, City of Naga, Moalboal, Sibonga ug Liloan nga nasulod sa Top 10.
•••
Nasagmuyo ko sa Facebook post sa usa ka higala nga mismo ilang katagilungsod nitamay sa wa pagdaug sa ilang contingent. Nakasabot ko sa iyang gibati.
Di lalim ang pagpangandam. Saksi ko sa pangandam sa Oslob nga hapit wa nay panahon pagpahulay sa mga estudyante nga apil sa grupo.
Pero sumala sa unang linya sa kantang Just Once, ‘I did my best but my best wasn’t good enough.’ O, kon maayo man gani, dunay mas maayo pa.
•••
Karong Sept. 21 na ang panagtigi sa 15 ka mga official candidates sa Ginoong Pilipinas Cebu nga sila si Erik, Dan, Vengie, Enzo, Alexis, Edbert, Gerald, Jose, Brian, Francis, Joran, Jaron, Kensley, Earl ug James.
Si Dexter Alazas ang Prov’l. Director sa Cebu. Tumong sa bangga ang pagpili sa lalaking mahimong imahe sa modern day hero ug maoy modala sa ngalan sa Cebu sa national finals didto sa kaulohan.
•••
Nahimuot ko sa reklamo kuno sa mga niadto sa Ocean Park nganong way giraffe ug ubang hayop parehas sa Safari Adventure Park. Gitubag sab kini kon duna ba sad kunoy sharks ug ubang marine creatures sa Safari. Pastilan!