MISAMUT ang pagduda sa katawhan nga aduna na gayuy problema sa relasyon tali nila ni Mayor Edgar Labella ug Bise Mayor Mike Rama. Kaniadto ang nangreklamo mao ang dumadapig sa bise mayor nga suma pa wala kahatagi og dakung pwesto sa city hall. Gani mura og nag-ilhanay na kuno karon kon si kinsa sa mga konsehal ang kaabin ni Mayor Labella ug kang Bise Mayor Rama.
Karong bag-o, nag-isyu og executive order si Mayor Labella nga nagtukod sa Cebu City Sinulog Governing Board nga magbantay sa mga kalihukan sa Sinulog Foundation, Inc. (SFI). Si Mayor Labella maoy chairman niining maong governing board. Ang mga sakop niini mao sila si Gobernador Gwen Garcia o ang iyang representante, walo sa sakop nga itudlo sa mayor, lima ka trustees sa SFI, duha ka mga konsehal, Cebu City Police Office director, Department of Education (DepEd) Cebu City division superintendent, rector sa Basilica Minore del Sto. Nino, Land Transportation Franchising and Regulatory Board (LTFRB) 7 director, Cebu City Transportation Office (CCTO) head, Land Transportation Office (LTO) 7 director, Department of Health (DOH) 7 director ug Armed Forces of the Philippines (AFP). Si Bise Mayor Rama maoy chairman sa SFI uban sa mga trustees. Ang executive director sugod sa Sinulog 2020 mao ang igsuon sa mayor nga si Jojo Labella.
Kaniadto way laing magbuot kon unsay mga kalihukan sa Sinulog. Sugod sunod tuig nga Sinulog ang governing board na ang mag-organize sa sinulog festival. Mao na usab kini ang mogiya sa SFI ug sa executive committee tungod kay kini mao na ang policy determining ug regulatory body. Sila usab ang mo-aprobar sa tanang resolusyon ug mga kalihukan sa SFI executive committee. Gitudlo usab sa mayor ang Office of the City Administrator nga maoy secretariat sa board. Kon mao kini unsa pa man ang gamit sa SFI? Tingali og mao na lang kini ang modawat sa mga amut og sa bayad sa mga sponsors alang sa Sinulog. Kana kon dili mahimong makadawat og hinabang gikan sa gobiyerno ang maong governing board. Kon mahimo kini sa maong board, maayo tingaling mamutos na lang kining Sinulog Foundation kay mura na lang kini og kiko-kiko sa board.
Mao ba kini katarungan nganong misibaw kining tabi-tabi nga ang grupo ni Bise Mayor Rama makig-alayon na lang kuno sa Bando Osmena-Pundok Kauswagan (BOPK) ni kanhi Mayor Tomas Osmena sa sunod eleksiyon? Paninguha-on kuno ni Rama nga siya maoy mahimong standard-bearer sa BOPK aron iyang atbangan si Mayor Labella. Ambut kon aduna bay igong kaisug si Rama nga tunlon lang ang iyang garbo ug makig-abin sa kanhi mayor nga higpit niyang kaaway kaniadto? Sa laing bahin dawaton kaha ni kanhi Mayor Osmena ang grupo ni Rama? Apan posible kini kon atong basihan ang panultihon nga “In politics there are no permanent friends or enemies, only permanent interests.”
(mannyrabacal1144@gmail.com)