NAKAHUKOM ang usa ka ulitawong guwang nga magminyo na siya. Apan kay wa man siyay uyab, nipalit siya og line ad sa newspaper kay nangita og pangasaw-unon. Ang iyang gisuwat, “Wanted: Wife,” ug ang iyang cellphone number.
Sa dihang nigawas ang maong advertisement, nagpusot-pusot ang mga text messages nga iyang nadawat. Sa dihang iyang gibasa, nasayran niya nga gikan diay ang maong mga text sa mga bana nga gustong ihatag ngadto kaniya ang ilang mga asawa.
Karon, maayo tingaling mopagawas kita og line ad nga “Wanted: Heroes.” Kay matod pa ni Senador Imee Marcos, wa pay opisyal nga gideklarar nga mga nasudnong bayani bisan pa kon gisaulog nato niadtong Lunes, Agusto 26, ang National Heroes’ Day.
•••
Klaruhon ta ni bi. Tinuod ba nga way mga nasudnong bayani ang Pilipinas? Unsa man diay nang gisaulog nato nga Dr. Jose Rizal Day matag Disyembre 30 ug Andres Bonifacio Day kada Nobyembre 30?
Ang Rizal Day, atol sa pagbaril ni Rizal sa Bagumbayan, karon Luneta o Rizal Park sa Manila, gideklarar nga usa ka public holiday ubos sa Act No. 345 nga gipasar sa Philippine Commission niadtong Pebrero 1, 1902.
Samtang ang Bonifacio Day, atol sa adlaw nga natawhan ni Bonifacio, gihimong usa ka public holiday ubos sa Act No. 2946. Gibutang sa adlaw nga natawhan ni Bonifacio kay kontrobersiyal man ang pag-execute kaniya sa iyang mga kaubang rebolusyonaryo.
•••
Matod pa ni Senador Marcos, girekomendar niadtong 1995 sa Philippine National Heroes’ Committee nga ideklarar nga mga nasudnong bayani sila si Jose Rizal, Andres Bonifacio, Emilio Aguinaldo, Apolinario Mabini, Marcelo H. del Pilar, Sultan Dipatuan Kudarat, Juan Luna, Melchora Aquino ug Gabriela Silang.
Apan wa kini maresolbar sa mga debate ug nakalimtan na lang. Matod pas taga Cabadiangan, morag asin nga nahug sa linaw, natunaw. Pero duna na may mga balaod nga nagdeklarar nila ni Rizal ug Bonifacio nga mga nasudnong bayani.
Kanang uban supporting cast ra na. Unya mangita pa kita’g mga bayani? Di na ta kinahanglang motan-aw pa sa layo. Kay matag usa kanatong mga Pilipino naghambin og dyutay’ng kinidlap sa pagkabayani nga motumaw ug mosilaob ra sa tukmang panahon.