NASUNOG ang usa sa mga barko sa Lite Shipping Lines nga nagbiyahian sa Bato port, Samboan, Cebu ug Dapitan City nga rota niadtong miaging gabii. Ang MV Lite Ferry 16 naglawig pa-ingon sa Pulawan port, Dapitan City sa dihang misilaub ang kayo gikan sa engine room.
Kinsa bay dili mataranta nga nagdilaab na ang barko? Nangambak ang uban sa dagat kay halos katunga na sa barko ang gilamoy sa kayo. Tulo ang konpirmadong namatay, apil ang usa ka tuig nga bata, batan-on ug usa ka senior citizen. Maayo lang kay adunay laing barko nga nakaagi sa lugar nahitaboan kay dugay kaayo miabot ang rescue vessel sa Coast Guard.
Si Victor Cadelina, usa sa mga managers sa Lite Shipping, nga maoy gipadala sa management didto sa Dipolog City aron mo-asikaso sa mga biktima, nagkanayon nga 182 ka mga pasahero ang naluwas. Atoa ang uban sa hospital sa Dapitan ug Dipolog. Samtang ang uban nakauli na sa ilang lugar. Kasagaran sa mga pasahero taga Zamboanga del Norte.
Gihatagan og financial assistance sa management ang matag pasahero ug abagahon sa kompaniya ang gasto sa hospital sa mga na-admit ug ang nangamatay. Si Lucio Lim Jr., president ug chief executive office sa Lite Shipping, sa akong interview sa DYSS Super Radyo, mipasalig nga abagahon nila ang tanan ug imbestigahon ang hinungdan.
Tulo pa lang katuig na-acquire sa Lite Shipping ang barko nga 23 na ka tuig ang edad. Second hand kini apan bag-o ra usab nabaradiro. Giilisan ang makina ug generators. Gawas sa electrical connection o gas leak, gitan-aw usab ang posibling sabotahe sa mga dautang elemento sa Mindanao.
Matod pa ni Lim nga pipila ka buwan ang nakalabay, ang iyang nga security personnel naka-kompiskar og mga armas nga ipalusot unta paingon sa Mindanao gikan dinhi sa Sugbo. Ug basin mi-resbak ang mga sindikato. Mao nga miapil ang taga National Bureau of Investigation (NBI) sa imbestigasyon gawas sa Board of Marine Inquiry. Dili baya usab layo kining maong posibilidad. Dinhi ra unya masuta ang tinud-anay nga hinungdan kon aksidente ba o sabotahe. (bobbygnalzaro@gmail.com)