DIHANG nagsabotsabot pa ang oposisyon sa Siyudad sa Sugbo kinsa ang standard bearer sa partido, si Bise Mayor Michael Rama nagsige og insister nga siya ang modagan pagkamayor. Nagkadugay, nakombinser ra siya nga si Mayor Edgardo Labella ang mag mayor samtang siya mo-slide sa pagka bise mayor.
Apan mao pa gani pagsugod sa administrasyong Labella, duna nay mga timailhan sa posibleng panagbuwag sa dan sa duha ka mga lider. Ang labing uwahi niini mao ang pagtukod ni Labella og Sinulog board nga wa pahibaw-a si Rama. Ang bise mayor, chairman sa Sinulog Foundation Inc., wa makauyon.
Kon magpatigbabaw ang garbo ni Rama kay siya kanhi mayor ug lider sa Team Rama, posibleng mabuak ang grupo. Usa ray malipay ani kon mahitabo man, si kanhi mayor Tomas Osmeña.
Kon magkabuwag man ang dan nila ni Labella ug Rama, pahimudsan kini ni Osmeña, kinsa naninguhang magpabiling relevant ug hisgutan sa publiko bisan wa na siya sa katungdanan. Iya na gani gipangkiha sila si Labella tungod sa wa pagtugot sa mayor nga makaayo sa iyang opisina.
Iya pang gisakyan ang isyu sa Bus Rapid Transit (BRT), usa sa mga init nga hisgutanan karon.
Huna-hunaon usab unta ni Rama nga si Labella ang usa sa loyal niyang mga kaalyado bisan gipiit nag maayo ni Osmeña, wa mobiya kaniya. Duna nay mga pagsuway sa pagkombinser sa mayor nga motapon sa kampo ni Osmeña kaniadto, apan wa kini niya buhata. Bisan dihang ginganlan siya ni Presidente Rodrigo Duterte og drug protector, wa siya biyai ni Labella. Gipanalipdan pa gani siya sa mayor.
Ang pagdagan usab pagka mayor, di kadto desisyon ni Labella, sa partido kadto ug uban nilang mga kaalyado kay ilang nakita nga lisod pang makabangon si Rama sa pagkabuak sa iyang reputasyon.
Unta, maleksyon siya sa iyang sayop sa 2016 elections.