HUGOT nga gibaharan sa City Disaster and Risk Reduction Management Office (CDDRMO) ang mga opisyal sa barangay bahin sa ilang mga responsabilidad sa kaandam sa kalamidad ug "mitigation," usa ka adlaw human nilunop ang nagkadaiyang lugar sa dakbayan sa Davao human ang tubig sa Talomo River nilapaw.
"Ang usa ka kinabuhi nga makalas niana, if we found out kay wala nila gihimo ila disaster preparedness and mitigation, he is responsible," bahad ni CDRRMO operations officer Rodrigo Bustillo kagahapon, Huwebes, atol sa iSpeak media forum sa City Hall of Davao.
Ang pahayag ni Bustillo nahitabo human ang mga pagbaha niadtong Miyerkules sa gabii, Agosto 28, kon diin mga naapektuhan nga mga lugar duol sa sapa sama sa Tugbok, Talomo, ug Catalunan Pequeño nakasinati og lapas sa tawo nga tubig tungod sa dugay nga pagbunok sa ulan (localized thunderstorm) nga nasinati sa dakbayan.
Gipasidan-an sa CDDRMO ang mga opisyal sa ilang mga responsabilidad isip frontliners atol sa kalamidad ug uban pang mga emerhensiya nga sitwasiyon.
"Maong ginapakusgan nato ang barangay kay sila una mo-respond ingkaso naa ing-ani nga sitwasiyon. That is why we capacitate them," pagklaro niya.
"This is a stern warning to all the barangays. We should not take for granted the disaster preparedness," dugang pa niya.
Ang 1991 Local Government Code ug ang Philippine Disaster Risk Reduction and Management Act of 2010 nagmando sa lokal nga kagamhanan sa gobyerno maoy manguna sa emergency measures atol sa kalamidad.
Nahiunod sab sa memorandum sa Department of Interior and Local Government Unit (DILG) nga nagkanayon nga ang local governments maoy magseguro sa "installation of signages and markers in identified hazards and danger zones."
Niadtong Agosto 29, alas 6 gabii, ang City Social Services and Development Office (CSSDO) nakatala og 3,559 ka pamilyang naapektuhan sa baha sa mga nahisgutang lugar.
Matud ni Bustillo nga ang CDDRMO di pa makakompirma sa lima ka indibiduwal nga sayo niini giingong nadala sa bul-og sa baha.
Sa bahin sa CDDRMO, matud ni Bustillo nga nipagawas na sila og sayo pa nga pahimangno kon diin mga barangay gipahibawo sa posibleng baha sa mga alas 3 hapon. Samtang ang pre-emptive evacuation giisyu sa mga naapektuhan nga barangay mga 4:30 sa hapon, ning maong oras gialerto ang wangwang sa maong mga lugar. Samtang ang forced evacuation giimposar bandang alas 5:30 sa gabii.
Apan matud niya nga bisan pa niini, kadaghanan sa mga molupyo wala mibakwit tungod kay alang sa uban, naanad na sila nga motaas ang tubig.
Apan giklaro niya nga ang lunod niadtong gabhiona "as one of the massive flooding within the river," base sa iyang personal nga kasinatian.
Samtang mga lugar nga naa sa daplin sa sapa gideklarang "No Build Zone," matud niya nga ang lokal nga kagamhanan ilabi na ang City Planning and Development Office (CPDO) padayon pa sab nga naghingpit aron nga malakip ang maong mga lugar.
Di sab nila dali nga maimposar kini tungod sa kawalay resolusyon sa siyudad nga nagdeklara sa maong mga lugar nga ingon niini.
Gibanabana nga 10,000 ka pamilya ipabakwit kon ang maong mga lugar opisyal nang ideklara nga "No Build Zones."