MGA tindera og buhi nga mga manok sa karaang merkado sa Dakbayan sa Mandaue nabalaka nga wa silay mabalhinan nga lugar sulod o gawas sa bag-ong merkado tungod kay di mosugot ang Siyudad.
Nakabalhin na ubang vendors ug nalipay sa pagbukas sa bag-ong merkado sa dakbayan, apan pipila sa mga tindera sa mga buhing manok wa mangalipay.
Kini tungod kay wa silay kabalhin kon asa na sila makapadayon sa ilang panginabuhian kay wa na sila tuguti sa Siyudad nga mosulod sa bag-ong merkado. Usa lang si Gina Malinao, 50, pila na ka mga tuig nga naninda og buhing mga manok sa karaang merkado.
Duha na lang sila nga nagtikaw-tikaw sa karaang merkado tungod kay gibyaan na sila sa mga tindera.
Ang chairman sa komitiba sa merkado, Konsehal Jimmy Lumapas, niangkon nga way luna nga giandam ang Siyudad alang sa mga maninda og buhing manok sa bag-ong merkado.
Matod ni Lumapas nga usa sab sa ilang rason mao ang kahadlok nga posibleng magdala lang og kadaot ang hugaw sa mga manok sa mga pagkaon nga gitinda sa sulod.
“Wala ko niingon nga dili jud sila pasudlon. Ang ako is mangita mi og laing lugar sa merkado nga layo sila sa karne”, matod ni Lumapas.
Gipasabot usab sa City Market Administrator Mussoline Soliva nga daan nang niabiso ang City Veterinary office nga di pwede nga usahon ang baligyang livestock ug karneng baboy o manok sulod sa merkado.
Nipasalig hinuon siya nga hisgutan nila kini sa konseho aron mahiluna ang mga tindera nga hangtod karon anaa natanggong sa karaang merkado.