IPA-rescue karon sa kagamhanan sa dakbayan sa Lapu-Lapu ang mga naglaruylaroy sa kadalanan sa dakbayan nga adunay mga deperesnsya sa pangisip.
Kini aron kalikayan ang mga insidente sa pagpamato ug pagpamunal niining maong mga tawhana sa publiko.
Mao kini ang lakang nga nakab-ot ni Lapu-Lapu City Mayor Junard “Ahong” Chan human nga niadtong Lunes, Agusto 26, sa udto usa ka mangomprahay sa merkado publiko sa dakbayan ang gibunalan ug kahoy sa usa ka deperensyado ug pangisip nga naglakaw-lakaw sa dapit.
Naigo ang ulo sa biktima nga dali usab nga gitabang sa mga medical personnel human makaangkon og samad sa ulo.
Kagahapon sa buntag Huwebes laing lalake usab nga nailhang si Anecito Igot ang gibato usab ug laing lalakeng adunay deperensyado sa pangisip sa Barangay Bankal nga miresulta sa pagkasamad sa iyang bukton.
Matod ni Chan nga sa iyang pakisusi kasagaran niining mga tawhana nga adunay deperensya sa pangisip mga wala makatumar og maintenance nga tambal gumikan sa kawad-on.
Pipila kanila aduna usay mga kabanay sa dakbayan.
Posibleng e-refer lang una sa Vicente Sotto Memorial Medical Center VSMMC ang mga ma-rescue nga adunay deperensya sa pangisip sanglit wala pay pasilidad ang dakbayan sa pag-atiman niini.
Laing nahunahunaan ni Chan mao nga ipbutang una sila og usa ka pasilidad sa dakbayan diin butangan og doktor nga mag-monitor. Sayod siyang puno sab ang VSMMC.
Kon atimanon ang mga ma-rescue sa ilang kabanay, mas maayo usab, matod ni Chan. (GCM)