NIBALI na ba ang pipila ka mga sakop sa konseho sa dakbayan sa Lapu-Lapu ubos sa kampo sa mga Radaza ngadto kang Lapu-Lapu City Mayor Junard “Ahong” Chan?
Mao kini karon ang dakong pangutana human nga gibutyag ni Chan nga moabot sa 8 ka mga konsehal sa dakbayan ang iyang gipang-aporan ug tag 10 ka mga staff sukad sa miaging buwan.
Bugti sa naasoyng pagpang apudapod sa staff sa mga konseha, matod ni Chan, mao ang pagsuporta sa iyang administrasyon.
Ang mga konsehal nga giingong nakadawat og staff gikan ni Chan mao sila si Queenine Malingin-Amman, Marcial Ycong, Junrey Gestopa, Rico Amores, Rex Mangubat, Efren Herrera, Epoy Paquibot ug Laika Tampus.
Gawas sa 8 giingong nipadala na usab og “feeler” ang laing 4 ka konsehal sa kampo sa mga Radaza nga mamarayeg usab og mga staff gikan ni Chan.
Matod ni Chan nga wala niya mandoe ang mga konsehal sa pagsuporta kaniya bisan unsa ang iyang gustong mahitabo sa dakbayan apan kung alang kini sa kaayohan sa katawhan walay rason nga dili sila mosuporta sa iyang mga lakang.
“Ang akong kuan nila is suportahi lang ko para sa kaayohan sa syudad, kung naa koy binuhatan nga dili makaayo sa siyudad babagi ko mao na deal nako nila,” matod ni Chan.
Sa 8 ka mga konsehal sila si Tampus, Paquibot ug Herrera pulos misupak sa plano untang pag-override sa konseho sa veto ni Chan sa ordinansa sa dakbayan nga magkinahanglan og approval sa konseho ang si bisan kinsa nga maglukat og developmental ug business permit sa mga foreshore land sa dakbayan.
Samtang, ang 5 nga miuyon sa pag-override sa veto sa mayor mao sila si Malingin-Amman, Gestopa, Amores, Ycong ug Mangubat nga nakadawat na usab unta ug staff gikan ni Chan.
Dihang gipangayoan og reaction kalabot niini wala ra hinuon kini igsapayan ni Chan sanglit wala man gihapon ma override iyang veto sa konseho human nga wala makakuha ug 2/3 votes ang mayorya sa konseho.
“Well sa katong uban ato nga ni-override unta makaingon ta nga murag dunay exemption for the reason nga usa maoy proponent (Amores) unya ang usa maoy ni second (Ycong) so dili sila kabali sa ilang baroganan but sa uban posible nakalitan siguro wala pa nila masabti ang maong ordinansa nga atong gi-veto,” matod ni Chan.
Usa sa mga konsehal nga natagaan og staff ni Chan nga nahinabi ning mantalaan ug dili lang magpahingalan miklaro nga nagpabilin ang ilang loyalty sa kampo sa mga Radaza apan mipasalig nga andam sila mosuporta ni Chan kung alang sa kaayohan sa dakbayan ang mga lakang niini.
Si Chan nagtuo nga sa higayon nga makuha niya ang suporta sa konseho hayan wala nay babag ang iyang mga plano nga kaayohan sa dakbayan. (GCM)