USA ka taxi driver nga natanggong sa bilanggoan human gisia ang citation ticket sa atubang sa traffic enforcer ang gipasakaan na og kasong resistance and disobedience to an Agent of person in authority.
Hinuon, Miyerkules sa hapon, Agusto 28, gawasnon na kini.
Napriso gyud og upat ka adlaw ang usa ka taxi driver, human niya gisia ang giisyu nga citation ticket atubangan sa traffic enforcer sa City of Talisay Traffic Operations Development Authority (CT-TODA), nga nag-isyu niini.
Giila kini nga si Jose Cosmod, 46, taga dakabyan sa Sugbo.
Matud ni Tumulak, alas 3:30 niadtong’ Sabado sa hapon, Agusto 24 giisyuhan si Cosmod sa usa sa mga traffic enfrocer og citation.
Tungod sa paghunong niini sa ‘no stopping’ area sa ubos sa flyover sa Barangay Tabunok, syudad sa Talisay.
Giingong’ gigisi niini ang citation, nga nakita pa sa nag-issue nga traffic enforcer, ug napunitan pa kini human gilabay.
Hinungdan nga gialarma kini hangtud nga napara ang taxi ug gisikop ang drayber.
Gipasabot ni Jonathan Tumulak, pangulo sa CT-TODA, nga dili sila manghilabot kon unsay buot buhaton sa drayber sa citation ticket.
Apan ang gibuhat niini nga anaa pa ang enforcer, samtang gigisi ug napunitan pa sa enforcer, matud ni Tumulak usa na ka pagpaog walay respeto ug walay tahud.
Hinungdan nga kini gisikop ug gipasakaan og kaso nga ‘Resistance and disobedience to an Agent of person in authority’.
Napasaka ang kaso niadtong Martes, Agusto 27, apan sa Miyerkules sa hapon, Agusto, 28, nakaangkon sa iyang temporaryo nga kagawasan, human nipyansa si Cosmod.
Apan awhag usab ni Tumulak sa publiko nga kon adunay makita nga mga abusado nga enforcer i-report usab dayon kini sa ilang buhatan.
“Ato ni gibuhat, aron atong ipakita ngadto sa mga motorista nga seryuso ta sa atong kampanya sa trapiko, apan bisan pa man ana ato awhagon ang katawhan, labi na gyud sa motorista willing kaayo mi modawat sa mga report kon ugaling duna mi mga traffic enforcer nga mga abusado, mo-conduct tag investigation and after sa investigation ug ma-proven gani sila nga guilty, ang mahitabo, dili ta magpanuko sa pagtakatak sa serbisyo aning mga enforcer nga abusado,” pasabot ni Tumulak. (FMD)