USA ka patsada nga drone light show ang mitapos sa Higalaay Festival 2019 diin kini ang labing unang light show nga gipahigayon sa Mindanao.
Dako kini nga garbo sa lokal nga kagamhanan sa siyudad sa Cagayan de Oro tungod kay liboan nga katawhan ang nakasaksi niini sa SM City Uptown niadtong Agusto 28.
Sa pakighinabi kang Eileen San Juan, tsirman sa Higalaay Festival, gibutyag niini nga daghan ang katawhan nga nisaksi ug mapasigarbuhon ang siyudad kalabot na niini.
"This is the first in Mindanao, so we're proud to have it nga nia gyud sa Cagayan de Oro nagsugod," matud ni San Juan.
Ang mga nanag-iya og drone naghatag og lingaw sa katawhan pinaagi sa ilang drone light sa kawanangan sa nagkadaiyang porma sama sa heart, smiley ug uban pa ug kolor sulod sa mga anaa sa unom ka minutos.
Gibutyag ni San Juan nga sugod karong tuiga, dili na kompetisyon ang Higalaay Pyro Fest apan itandi kaniadto, mas taas ang fireworks display nga miabot og 15 minutos kaysa kaniadto nga dunay tulo ngadto sa upat ka minutos lamang ang matag partisipante.
Lauman nga sa sunod tuig, mas taas pa ang pasundayag sa drone light ug mas paninduton pa.
"I would think that they will even have a better show next year kay ayha palang gyud nato nasugdan so I'm sure it would be sophisticated next year," dugang pa.