GITUOHANG kanhi hitman sa New People’s Army (NPA) nasikop sa kapulisan sa iyang gitagoan niadtong Miyerkules sa hapon, Agusto 28, sa Brgy.Guiwanon, lungsod sa Tabuelan.
Si Jonbert Momo, 29, dunay kapuyo, lumad nga taga Bongbong Pangantucan, Bukidnon, kanhi sakop sa mga rebelding NPA, nadakpan nila ni Police Lt. Col. Rene Kyamko, hepe sa 1st Provincial Mobile Force Company (PMFC) CPPO, pinasikad sa warrant of arrest sa kasong murder.
Ang warrant giisyu ni Judge Eldred Cole, sa Regional Trial Court (RTC) 10 sa Malaybalay, Bukidnon nga gipitsahan niadtong Hulyo 10, 2019.
Ang kaso may kalabutan sa pagpatay sa sa kanhi leader sa mga NPA, Jerry Baquio.
Si Kyamko, nga nahinabi sa Superbalita Cebu niingon nga nakadawat silag impormasyon gikan sa ilang counterpart sa Bukidnon kabahin sa usa ka wanted nga gika-report nga kanhi sakop sa NPA.
Ang kasong murder gipasaka ni Yolanda Baguio, asawa ni Jerry. Si Yolanda nialigar nga ang iyang bana gipatay sa ni Momo, alyas Ebong Momo.
Sila si Momo ug Jerry managkauban kanhi.
Si Momo nibiya sa mga rebelde, nibalik sa gobyerno ug nadawat nga sakop sa Civilian Armed Forces Geographical Unit ( CAFGU).
Apan gipatay ni Momo si Baguio niadtong Nobiyembre 27, 2018 sa Maramag, Bukidnon.
Si Kyamko nibutyag nga nagtrabaho na si Momo isip construction worker.
Sa ilang pag-abot, nidagan si Momo hinungdan nga nahitabo ang ginukdanay, apan ila rang nadakpan.
Matod pa ni Kyamko nga si Momo wa maglihok dinhi sa Sugbo kay igo rang nitago.
Si Momo nga nahinabi sa Superbalita Cebu nihimakak sa pasangil batok kaniya.
Matod niya nga mga rebeldeng NPA ang ningpatay kang Baguio, wa siyay labot. (GPL)