DUHA ka buwag nga mga operasyon sa kapulisan niresulta sa pagkasikop sa tulo ka gikatahapang mga kawatan og motorsiklo samtang usa ang nakasibat.
Si PLt. Col. Maribel Getigan, hepe sa Danao City Police Station, niila sa suspek nga si John Karl Granada Vergara, 31, ulitawo, taga Barangay Buhisan, Siyudad sa Sugbo, ug 17 anyos nga lalake, kinsang ngan gipugngan kay menor.
Usa sa mga kauban nga giilang si Niño Castro nakasibat. Ang operasyon sa kapulisan gihimo human nireklamo si Jemson Almaden, 31, nga gikawat ang iyang motorsiklo, mga alas sa 6 sa gabii sa Miyerkules, Agosto 28, sa ilang balay sa Sitio San Roque, Barangay Baliang, Dakbayan sa Danao.
Usa ka tawag sa handheld radio ang nadawat sa kapulisan kalabot sa pagpangawat.
Dali nga niresponde ang mga pulis pinaagi sa pagbutang og checkpoint sa national highway.
Nakit-an sa mga pulis sila si Vergara ug kaubanan sakay sa duha ka mga motorsiklo nga natukma sa description.
Gisuwayan pa sa pagpahunong ang duha ka mga motorsiklo apan nisaylo sa mga pulis.
Nahitabo ang gukdanay
Ilang naapsan sila si Vergara ug ang menor, apan nakasibat si Castro nga dala ang kinawat nga motorsiklo.
Nakuhaan ang duha ka mga suspek og usa ka kalibre .45 nga pistola ug granada.
Kasong kalapasan sa Akta Republika 10883 o pag pangarnap og motorsiklo ingon man paghupot og explosive ug armas ang atubangon sa mga suspek. Usa sa mga kaso way pyansang gitugot.
Sa pikas bahin, laing tawo nasikop sa pagpangarnap og motorsiklo sa Dakbayan sa Naga.
Si P Maj. Jason Villamater nga nahinabi sa Superbalita Cebu niila sa suspek nga si Ronald Segovia, 25, taga Purok Caimito, Barangay Sibago, lungsod sa Sibonga.
Matod pa ni Villamater nga si Segovia didto nagtago-tago sa Dakbayan sa Naga tungod sa mga kaso sa pagpangawat og motorsiklo.
Hiniusa nga pwersa sa Naga City Police Station pinangulohan nila ni Villamater ug PCapt. Michael Gingoyon sa Highway Patrol Group (HPG) 7, ilang gironda ang gitagoan ni Segovia sa Barangay Balirong, Dakbayan sa Naga pinasikad sa usa ka warrant of arrest.
Matod ni Gingoyon nga number 1 most wanted sa lungsod sa Pinamungajan ug ikalima sa Central Visayas tungod sa pagpangarnap.