TUNGOD sa nagkadaghang mga habal-habal sa Cebu City, si Cebu City Councilor Raymond Alvin Garcia nakakita og panginahanglan sa pag-regulate kanila.
Gibana-banang dunay 3,000 ngadto sa 4,000 ka habal-habal drivers sa Cebu City.
Si Garcia, nangamahan sa ordinansahon nga giulohan og Ordinance Granting to the Local Government of Cebu City the Power and Authority to issue Local Regulatory License and Permits to Operators of Motor Taxi commonly known as “habal-habal” and transport network companies within Cebu City.
Ang tumong sa ordinansahon mao nga ang Kagamhanan sa Siyudad igo rang moluwat og lokal nga local regulatory franchise/s sa habalhabal nga way pagpanginlabot sa registration sa motorsiklo, nga maoy unang gimbuhaton sa Land Transportation Franchising and Regulatory Board (LTFRB).
Ang ordinansahon naglatid nga ang mga habalhabal drayber gikinahanglang morehistro sa dapit diin sila nag-operate pinaagi sa pagpresentar sa driver’s license, official receipt ug certificate of registration sa sakyanan. Pinaagi niini, ang Siyudad moila kanila nga lehitimo.
Ang mga barangay kinahanglang mo-coordinate sa Cebu City Transportation Office (CCTO) kay mahimo silang makaisyu og plate number stickers sa rehistradong habalhabal.
Sa di pa ang registration, ang drayber kinahanglang mopailawom og riding skills training ug traffic rules and registration seminar sa di pa sila makaluwat og balidong driver’s identification (ID) card.
Ang drayber kinahanglan nga duna say third party insurance coverage, duha ka mga helmet ug uniform.
Ang driver ug operators kinahanglang mga sakop sa accredited Transport Network Vehicle Service (TNVS) kun transport network companies (TNC).
Pinaagi sa regulation sa habalhabal system, duna kini katumbas nga bayranan sa registration nga mao ang mosunod: motorcycle taxi opetrator, driver tag P250 ug ang motorsiklo P500.
Mobayad ang operators ug drivers ngadto sa City Treasurer’s Office nga tinuig nga dunay luwatan nga opisyal nga resibo.
Bag-ong gipalit nga motorsiklo kinahanglan nga irehistro sulod sa 15 ka adlaw gikan sa petsa nga kini napalit. Kapakyas paghimo ini dunay 50 posryentong surcharge.
Katunga sa makolektang bayad ihatag ngadto sa barangay diin sila narehistro aron pagtapak sa gasto sa ID ug plate number stickers. Ang ordinansahon naglatid og mga silot.
Mga kalapasan naglakip sa way motorcycle taxi registration/franchise, nag-driver nga way lisensya, expired license, way motorcycle taxi driver’s ID, depektusong suga, di tukma ang gisul-ob sa pagmaneho, guba nga tail light, way side mirror, expired LTO registration, way plate number, overloading, no left ug right turn, crossing solid line, reckless driving, mitaak sa sidewalk, way motorcycle taxi plate number sticker, parking sa two-way zone, kalapasan sa U-Turn, ug no entry nga ang tanan dunay tag P500 nga multa.
Laing mga kalapasan mao ang paggamit sa cellphone samtang nagmaneho, wa gitugot ug giusab nga tambutso ug giusab nga fuel tank nga dunay multang P1,000.
P2,000 ang multa sa way crash helmet.
Ang Cebu City Council niduso sa ordinansahon ngadto sa committee on laws nga gipangulohan mismo ni Garcia.
Mga sakop naglakip kanila ni vice chairman Phillip Zafra, ug Councilors Antonio Cuenco, Dave Tumulak, ug Renato Osmeña Jr. Niadtong Agusto 4, 2019, si Cebu City Mayor Edgardo Labella nakigtagbo sa gropo sa mga habal-habal driver sa siyudad aron pasabton sa panginahanglan sa pag-regulate kanila.
“There is a conflicting legal opinion here, but I am banking for the general welfare... ultimately for the safety of the riding public,” matod ni Garcia sa phone interview sa SunStar Cebu.
Niadtong Pebrero 4, ang Ubos Balay Balauranan niaprobar sa ikatulo ug katapusang pagbasa sa balaudnon nga nagtugot ug nag-regulate sa paggamit sa motorsiklo isip pampublikong sakyanan.
Ang House Bill 8959, nga giulohan og “An Act Allowing and Regulating the Use of Motorcycles as Public Utility Vehicles, Amending for this Purpose Republic Act 4136 otherwise known as the Land Transportation and Traffic Code, and for other purposes,” gibotaran og 181-0.