KANHI kapitan sa Barangay Sima, lungsod sa Dumanjug, Cebu ugdrug surrenderer niadtong 2016 apan wa moundang sa pagpamaligya og illegal drugs, nadakpan sa buy-bust sa Drug Enforcement Unit alas 5 sa hapon sa Huwebes, Agusto 29.
Lakip sa nasikop ang lima ka mga tawo nga nanuyop sud sa balay nga gihimong drug den, usa niini Sangguniang Kabataan chairman sa usa sa mga barangay sa Dumanjug.
Matod ni PMaj. Ardioleto Cabagnot, hepe sa Dumanjug Police Station, nga atol sa ronda sa sa panimalay ni kanhi Sima barangay captain Raul Saromines, 48, nasikop nila ang lima ka mga tawo.
Ilang gi-monitor ang balay ni Saromines sud sa duha na ka mga semana hangtod nga gihimo ang buy-bust operation nga niresulta sa pagkasikop niini ug sa lima pa ka mga tawo nga naaktuhan nga nag suyop.
Usa sa lima giilang si Roy Allan Lambo, 23, SK chairman sa Barangay Ilaya. Matod ni Cabagnot nga si Saromines maoy mangunay sa pagpangompra sa drugas sa Barangay Duljo Fatima, Dakbayan sa Sugbo.
Nakuha gikan kang Saromines, giilang high value target, ang shabu nga gibana-banang nagbalor og P20,000.
Si Saromines wa manghimakak nga iyaha ang drugas. “Nahadlok ko, Sir, oi. Pero unsaon ta man ning akong sitwasyon nga akong mga bata wala koy ikahatag nila,” matod ni Saromines.
Si Saromines nahimong kapitan sa Barangay Sima sulod sa 25 ka tuig.
Si Dumajug Mayor Guntrano Gica dihang gikuhaan og habig sa Superbalita Cebu, niingon nga siya nasagmuyo sa hitabo.
“Nasagmuyo jud ko sa nahitabo no nga nadakpan ni sila. I know them personally and I have talked to them before ug gihangyo nga moundang na,” butyag sa mayor.
Wa siya magtuo nga nagpadayon si Saromines sa iyang pagpamaligya og shabu bisan kadaghan na niya badlunga.
“Mas nasuko ko ug na-disappoint kay naa pa gyud sa akong barangay kon asa ko nagpuyo,” matod ni Gica.
9 nasikop sa PDEA
Siyam ang nadakpan sa duha ka buwag nga mga operasyon sa Philippine Drug Enforcement Agency 7 sa Barangay Carreta ug Duljo Fatima, Siyudad sa Sugbo. Unang operasyon nga gihimo pasado alas 10 sa Huwebes sa gabii, Agusto 29, nga niresulta sa pagkasikop sa duha ka mga tawo sa Sitio Ponce 2, Barangay Carreta.
Giila sa tigpamaba sa PDEA-7, Leiah Albiar ang mga dinakpan, nga sila Rose Satsat, 25, taga Barangay Mambaling, ug Wilfredo Semblante, 44, taga Sitio Laray, Barangay Carreta.
Samtang Biyernes sa alas 11:30 sa buntag, Agusto 30, sa laing operasyon sa Sitio San Pedro, Barangay Duljo Fatima, gironda sa PDEA agents ang usa ka drug den.
Ilang nasikop si Lucres Aveilla, 44, nagmintenar sa drug den ug unom nga nagsuyop.
Nasakmit nga drugas sa duha ka mga operasyon moabot og 20 gramos nga dunay Dangerous Drugs Board (DDB) value nga P136,000.
Langyaw
Nasikop usab sa buy-bust operation sa Balamban Police Station ang Korean national nga si Kang Byung Yoon, 39, alas 12:20 sa Biyernes sa udto, Agusto 30 sa sitio Calag-itan, Barangay Buanoy.
Matod ni Police Major Christian Torres, hepe sa Balamban Police Station, nga HVT si Yoon tungod kay langyaw. Nakuha sa mga operatiba ang 11 ka pakete sa gidudahang shabu nga gituohan nga maoy nahabilin sa ilang stocks.
P3.6M drugs
Mobalor og P3.6 milyones nga shabu nasakmit sa kapulisan sa Station 5 sa Mandaue City Police Office (MCPO) atol sa managlahing mga buy-bust operation, Biyernes sa kaadlawon, Agusto 30, 2019.
Sa laing operasyon sa PDEA 7 Biyernes sa gabii, ilang nasikop si Patrick Caballero, 25, driver.
Nakuha gikan kaniya ang 200 gramos sa gituohang shabu nga mobalor og P2 milyunes.