TAGBILARAN CITY -- Gihagit ni Mark "Magnifico" Magsayo ang kanhi world boxing champion nga si Panya Uthok sa Thailand nga dili lang sa baba kon dili adto ibabaw sa ring buhaton ang panganti niini.
Ang beteranong 29-anyos nga Thai fighter nga Uthok, kinsa naila kaniadto nga si Pungluang Sor Singyu Onesong, una nang miluwat og pamahayag nga, sama sa ubang mga Pinoy nga iyang nakontra, iyang pakamangon ug paundangon si Magsayo sa ilang panagsangka ugma sa gabii, Agusto 31, alang sa WBC Asia Featherweight title nga ipahigayon sa Bohol Wisdom Gymnasium.
"Aw, sagad sa akong makontra mao gyud nay ilang isulti ngari nako. Adto lang na niya buhaton ibabaw sa ring, tan -awon lang nato," matod ni Magsayo kinsa naghupot og 18-0, 14 KOs nga baraha.
Kagahapon, atol sa tinimbangay nga gipahigayon sa Atrium sa Bohol Quality Mall, opisyal nga gideklarar nga ang duha untop nga nakakuha sa 126 lbs. nga maoy ilang awayan.
Hinuon, giangkon ni Magsayo kon unsa kalisod ang pagpakig-away sa usa ka beterano ug kanhi world champion kinsa adunay record nga 53-6, 35 KOs diin lakip sa pipila ka mga Pinoy nga iyang gipangbiktima.
“Kahibawo mi nga fighter kaayo ni siya (Uthok) mao ni among gipreparasyonan og maayo. Nagkinahanglan gyud mi og stamina, pataas sa hangin,” matod ni Magsayo kinsa amateur pa sa dihang gi-knockout ni Uthok si AJ Banal sa ilang world title fight niadtong 2012 sa Mall of Asia Arena.
Ang vice-president sa WBC Asia nga si Colonel Damrong Simakajorhboon sa Thailand mibutyag kon unsa ka importante alang ni Uthok ang maong away.
Matod niya nga kon modaog si Uthok, ilabi na og impresibo nga kadaugan, hayan mahibalik kini sa pagsulod sa rating sa WBC ug posibling makaaway kini og balik alang sa world title. Gusto ni Uthok nga taliwala sa iyang pangidaron iyang ipakita nga anaa pa siyay saktong ikabuga.
“This fight will determine his career. If he wins, then we he will be in the Top 15, and, it is posible for him to fight for the world title. But if he lose, then at his age, for me, he must good for retirement,” matod ni Damrong sa dihang gikahinabi sa Superbalita.
“That is why he is very well prepared for this fight. He sparred 100 rounds already since he started his training, three months ago,”
Si Frances Magsayo, ang asawa ni Mark kinsa maoy usab ang director sa Vladimir Boxing Promotion, mibutyag nga dili na malakip ang IBF Pan Pacific Featherweight title ning maong panagsangka.
Kini tungod kay uwahi na kaayong misanong sa ilang request ang IBF.
“Dinidrop namin yung IBF belt kasi late silang nag-reply, so instead of two titles, isa na lang. Yung WBC na lang. And maybe next yung IBF title na,” pasabot ni Frances.
Gikanselar usab ang away tali ni Roldan Aldea ug Aavar Turapov alang sa 140 lbs. Kini tungod kay gikatakdang moaway si Aldea sa Russia karong Septiyembre 7.
Apan ang gipaabot nga mokuha usab og atensiyon sa maong card nga giabagan sa lokal nga pangagamhanan sa Tagbilaran City mao ang away tali ni Philippine bantamweight champion Giovanni Escaner sa Marty Elorde Stable kinsa modepensa sa iyang titulo batok ni Pael Renoel sa Flores Boxing Stable sa 12-round match.
Mokompleto sa promotion nga gidalit sa Vladimir Boxing Gym mao ang panagsangka nila ni Virgel Vitor sa Tagbilaran City batok Allan Alberca; Rafael Clar kinsa mosuway sa katakos ni Pablito Balidio; Danrick Sumabong batok Jonathan Francisco; Powell Balaba batok Charlie Malupanga; ug Franco Serafica batok Jimboy Rosales.