MGA duwa karon
1:00 pm- Opening ceremony
4:00 pm- DBTC batok CEC (High School)
5:45 pm- USJ-R batok CIT-U (College)
Opisyal nang sugdan karong hapon ang 2019 Cebu Schools Athletic Foundation Inc. (Cesafi) Season 19 sa Cebu Coliseum.
Sama sa naandan, ipahigayon ang grandiyusong opening program sa ala 1:00 ang takna nga pagabuwakan sa pagpili sa Miss Cesafi 2019 alang sa high school ug college divisions.
Human sa opening program, sugdan ang kombati sa basketball event.
Sa premirong duwa, magsangka ang Don Bosco Technological Center (DBTC) Greywolves batok Cebu Eastern College (CEC) Dragons alang sa high school division.
Sa main game, magpinaksitay ang University of San Jose Recoletos (USJ-R) Jaguars ug Cebu Institute of Technology University (CITU) Wildcats alang sa college division.
Ang Jaguars usa sa teams nga nakuhaan og mga haligi human ubay-ubay sa ilang mga pambato ang nakatiwas na sa ilang playing years.
Sa interbyu sa Sun.Star Cebu, si Jaguars coach Leodie Garcia nagkanayon nga iyang kanunay pahimangnuan ang iyang mga batos nga motutok lang sa duwa ug mosunod sa ilang sestima aron matapakan ang dakong haw-ang sa ilang puwersa.
Lakip sa nawagtang sa puwersa sa Jaguars mao sila si Jaybie Mantilla, RJ Dinolan, Nichole Dinolan ug Segamars Ewenike.
Ning higayuna, mangulo sa Jaguars mao sila si slam dunk artist Miguel Gastador, Elmer Echavez, Renz Solomon ug foreign player, Adama Camara.
Gipasabot ni Garcia nga mapilde o modaog, ang importante alang kaniya nga kinasingkasing ug adunay garbo nga moduwa ang iyang batos.
Sama sa Jaguars, ubay-ubay sab nga mga sinaligan ang nawagtang sa puwersa sa Wildcats.
Hinuon ubos sa paggiya sa bag-o nilang coach nga si Edsel Vallena, gilauman nga makasukol og sakto ang Wildcats ning higayuna.
Nagkanayon si Jemcerson Sable, usa sa mga beterano nga nahabilin sa Wildcats, nga nagpanikad na silang mosubay sa sestima ni Vallena.
Matod ni Vallena nga iyang giugbok sa alimpatakan sa iyang mga batos nga kinahanglang mosalig sa ilang kaugalingon gumikan kay dako kini ikatabang sa ilang kampanya.
Ning maong tahas, mokombati ang Wildcats nga wala ang usa sa ilang mga sinaligan nga si JC Escalona, kinsa napahamtangan og usa ka duwa nga suspensyon. (ESL)