NAABTAN nakong naniudto ang mga parking aide sa sidewalk sa dalan P. Lopez sa dakbayan sa Sugbo niadtong Martes. Dul-an sa napulo silang nagkaon sa inato nga paninda sa ilang suki nga si Nanay Lolita Gellor.
Basi sa ilang uniporme dunay taga Cebu City Transportation Office (CCTO) ug dunay taga Cebu Parking Management (CEPAM), usa ka pribadong tigkolekta og parking fee. Kini nga talan-awon komon kaayo matag adlaw nga tanan alang ning maong mga parking aide.
Matod ni Michael Castillanes sakop sa CEPAM, makadaginot siya kong sa sidewalk mokaon bisan kong magbarug ra tungod sa ka apiki sa lugar. Kinse pisos nga sud-an og 10 pisos nga kan-on paigo na aron makalahutay sa init unya usahay uwanon nga matang sa panarbaho.
Sila si Jian Quiño ug Jonalyn Leyson mga parking aide sa CCTO niingon nga sa panahon karon kinahanglan nga magdaginot og wa na kinahanglana nga mangita pa og plastada nga kan-anan.
Nakabentaha man gani ang gobyerno sa ilang gibuhat kay naa ra man sila nagkaon sa dapit diin sila madistino. Sa ato pa, dali ra nilang manonitor ang mga sakyanan nga moparking o mogawas gikan sa parking slot.
Matod ni Nanay Lolita nga taga sitio All Season, Barangay Cogon Pardo, Cebu City kalipay niya nga nakatabang sa budget sa mga parking aide.
Si Nanay Lolita, 63, na-stroke 12 ka tuig na ang nakalabay og nag-inusara nalang pagsungasong sa mga hagit sa kinabuhi. Nag edad pa siya og 12 anyos pagpaninda og pagkaon uban sa iyang inahan mao nay iyang trabaho sa aseras sa Nation Theatre kaniadto sa dalan Colon.
Sama sa mga parking aide nga nangaon og akong nailaila sa dalan P. Lopez, ang magtiayon nga Gerry ug Leah Sente nakit-an sab nako nga naniudto sud sa jeep de pasaheroan sa dalan Legaspi ug Jakosalem.
Si Gerry maoy driver ug si Leah nagsilbi niya nga konduktor. Aron makadaginot, matod sa magtiayon mao ni ang naandan nilang gihimo nga magbawon ug magsawo pagpaniudto sud sa PUJ.
Nakapangutana si Gerry hangtod kanus-a sila magsawo pagpangaon sud sa inabangan nga PUJ taliwala sa gikatakdang phase out sa mga PUJ sunod tuig? Lain niya nga pangutana, asa naman lang unya siya padung?
Taudraud nako nga nakadungog ning maong pangutana sukad pa nga gideklarar sa gobyerno ang pag-ilis sa karaang PUJ ngadto na sa pagka moderno. Ug mao man gani siguroy hinungdan nga duna nay daghang operator ang niundang human ibaligya ang ilang mga unit. Sa ruta sa Inayawan akong nasayran gikan sa usa ka driver nga bag-o na ang iyang agalon kay nangahalin na ang tulo ka unit sa kanhi niya amo.
Ang tulo gibaligya lang og barato sa kantidad nga P430 mil.