SAYOD ka ba nga kining tumang stress maoy numero-unong maka-ingon sa mga nag-unang mga sakit sama sa cancer ug kalit nga kamatayon sama sa paghikog?
Unsaon man pag-ila kung ang stress subra na ug naka-apekto na sa tibuok nga kalawasan og nadlaw-adlaw nga tulumanon?
Matod sa Health Plus nga basahon ang pinaka obvious nga simtomas mao ang pagpanglarot sa buhok nga maoy maka-ingon sa pagka-pahak og sa ngadto-ngadto sa pagka upaw.
Dunay uban grabe nga modaot kay mawad-an naman og gana sa pagkaon samtang ang uban moburot sa ka tambok kay magsegi ug non-stop naman hinuon ang pagkaon.
Mailhan nimo nga stressed na kaayo kay way klarong konsentrasyon, kasagaran mura na og tulala o magtanga. Magsegi na lang og tungok unya dali kaayo nga masuko ug ma-igking bisag gamay ra nga kasikas.
Ang tumang stress maka-guba sab sa relasyon og makapawala sa gana sa pakighilawas kay ipa-ubos man ini ang gidaghanon sa hormones nga mao untay makatabang pagpadasig.
Mao sab kini maka-ingon sa insomnia (lisod sa pagkatulog) kay kanunay man maghuna-huna og balik-balik sa mga isyu og problema nga gisagubang. Ang insomnia maoy maka-ingon sa paglurat sa mata tibuok gabii nga mo resultya sa pagka-luya ug lapoy sa kalawasan.
Tungod sa ka kuwang sa katulog og pahuway, dali nga ma-iritabli ang tagtungod. Mao sab kini maka-ingon sa mga sakit-sakit sa kalawasan sama sa diarrhea (kalibanga), ulcer, sakit sa tiyan, chest pain, palpitation, og pagpanggahi sa kaunuran apil ang kanunay nga paglabad sa ulo , balik-balik nga sip-on ug ubo.
Unsa may buhaton aron di masubrahan sa stress?
Pag-ehersisyo kay kini makatabang pagpa-ubos sa cortisol (stress hormones) og padaghan sa endorphins, nga maoy natural nga painkiller.
Limitahan ang mga ilimnong dunay caffeine (kape, stokolati,tsa, softdrinks) kay makasamot kini sa kulba ug kurog.
Paminaw og hinay nga sonata unya bansay-bansaya ang pagginhawa og lawom sama nga nag meditate o yoga. Tan-aw og mga salidang kataw-anan og ikatawa ang stress.