GOOD day sa atong tanan nga buhi pa sa kinaulahiang adlaw sa Agosto, tuig 2019!
Sa mga nagapamalengke o naga-shopping natong mga kahigalaan, ang pagbasa sa “label” o putos diin nakasuwat ang mga impormasyon sama sa sukod (S/M/L/XL), timbang (500 grams), lasa (halang), ingredyente ug uban sa produktong ginabaligya.
Importanteng sutaon kining mga impormasyon aron tama ang mapalit nato, igsuon. Sa label pod nakasuwat ang “expiration” o pagkahupas niini. Gani, ang ubang mamalitay, bahalag madugay sa pagkametikuloso basta seguradong safe kaonon o gamiton ang gipamalit nila, migo.
Pero tawo aduna pa’y mga “label.” Matod sa mga pagtuon, ang “teorya sa label mao ang pamaagi sa pag-ila sa kaugalingon ug pamatasan sa tawo nga mahimong “maimpluwensyahan sa mga termino” nga ginagamit sa paghulagway o pagklasipikar niini.
Sa Bibliya, ang Ginoo naghimog “girl” ug “boy” apan sa atong sosyudad karon anaa nay “binabaye, lakin-on ug uban” pa, diba? Ang label mamahimong makapabag-o sa konsepto sa atong kaugalingon ug pagkatawo.
Anyway, dili ra pod sa sekswal nga oryetasyon adunay label apan apil sa atong mga pisikal, emotional o mental nga kapasidad, apil na pod ang atong mga kasinatian base sa mga desisyon nga atong gibarugan.
Ang tawo nga dili taas, “putot” ang tawag sa kadaghanan. Ang tawong naughan og utok sa droga nga karon naghubo nagpatid-patid og lata, “buang” na. Ang mga bentahoso sa kamaayo sa ubang tawo, “oportunista o mangingilad” pod silang grupoha. Ang dili managad, “istrikta,” ang buotan ra pod kaayo usahay matawagan og “tanga” kay nagapaabuso, ug ang mga sama nakong pamati kay “hilas” ha ha!
Bitaw, dili mahutdan og termino ang kalibotan aron motatak sa atong mga kinaiya’g binuhatan. Ang daghang sipyat sa personal, pamilya o sa laraw sa pagpanarbaho, mailhang “palpak, bogo, way pulos” nga tawo. Apan katong mga brayt, maabilidad ug kugihan, “successful, ideal ug inspirasyon” dinhi sa kalibotan.
As humans, daghan kaayo kita’g mga palpak, darling. Kasagaran, ang palpak natong binuhatan ang mahinumduman sa mga katawhan. People will always judge you, right?
Dili pa gayud nato mapalipay ang tanan, migo mao mas nindot tingali nga sa hilum, kita “magpuyo.” Bahalag unsay iingon o iputos nga isyu kanato sa kalibotan tungod sa atong imperpeksyon ug kahuyang; ang Ginoo ang atong kanunay’ng kadangpan.
Ang Diyos lang ang modawat kanato sa atong kinatibuk-an, mao ayaw ipugos imong kaugalingon sa imong paryenteg kasilinganan kay gubot gayud ang kasangpotan.
Sa tanang magpaubos ug modawat sa kapasayloan ni Lord, welcome sa Iyang kaharian. Ang atong “label” sa ubos sa Iyang trono mao ang “pinasaylo ug pinanggang anak sa Ginoo.” Busa ayaw pasige og pasipsip sa tawo. Amen?