SAMA sa mitabon ang liderato sa Coast Guard (CG) sa ilang unit nga nadestino sa Pwerto sa Dakbayan sa Dapitan bahin sa trahedya sa pagkasunog sa M/V Lite Ferry 16 niadtong Martes sa gabii, Agusto 27, sa kadagatan sa Dapitan sa Zamboanga del Norte.
Si Lieutenant Junior Grade Michael John Encina. tigpamaba sa Coast Guard District Central Visayas, daling nakakita og sayop o giingong kalapasan sa balaud human ilang nasuta nga wala motug-an sa matuod ang mga tripolante sa gidaghanon sa ilang kargamento sa ilang paggikan sa puwerto sa lungsod sa Samboan, Sugbo.
Ang pamahayag ni Encina atol sa press conference sa CG sa dakbayan sa Sugbo niadtong Lunes, Agusto 28, nimugna og laing pangutana ug nisumbalik kini sa ilang sakop. Igo lang modawat og papel nga report sa taga barko, dili sila linawas mosusi?
Ang mga kargamento dili pwede matago. Dagko kini ug makita dayon. Apan wala moluwat og bug-at nga pamahayag si Encina batok sa ilang mga kauban nga nagdumala sa CG sa Puwerto sa Pulawan sa Dapitan nga klarong dunay dakong tulubagon usab sa hitabo.
Ang barko duol na sa puwerto sa Dapitan. Nipadala og “distress call” dihang nasunog sa alas 11:30 sa gabii, apan buntag na lang, walay CG nga nitubag sa alarma? Mao kini ang alegasyon sa mga naluwas nga pasahero nga nahinabi sa media o nag-post sa social media. Dili kaha sila hubog ug nahinanok pag-ayo? o Way kapasidad? Ang tulubagon sa CG dili pwede matabonan. Ang buhis sa katawhan nagsuweldo kaninyo. Mr. Encina way tabontabon.
Ang Dapitan port kabahin national nautical highway sa nasod. Ang Dapitan-Dumaguete rota daghan na og biyahe nga barko. Kinahanglan palig-unon ug palapdan ang presensiya sa CG uban sa paggamit mas modernong ekipo ug kahimanan.