PATAY ang usa ka pulis sa lungsod sa Minglanilla human pusila sa mga tawo nga sakay sa usa ka van samtang siya ug iyang kauban naglingkod sa ilang patrol car sa N. Bacalso Avenue sa Barangay Linao-Lipata alas 2:50 sa Sabado sa kaadlawon, Agusto 31, 2019. Ang biktima mao si Police Staff Sergeant Alfredo Pagaling, 54, taga Barangay Vito, lungsod sa Minglanilla, team leader sa Mobile Patrol Section sa Minglanilla Police Station. Matod ni Police Colonel Roderick Mariano ang hepe sa Cebu Provincial Police Office nga nangunay sa pag-supervise sa imbestigasyon nga nagpahigayon sa ilang pagpatrolya. Uban ni Pagaling atol sa pagpusil si Police Corporal Allan Villasurda. Silang duha diha sa sulod sa patrol car nga Toyota Hilux nga ni-park atubangan sa convenience store. Matod ni Villasurda nga human siya makadungog og buto sa pusil, nigawas siya sa patrol car, apan wa na siyay nakita nga mga tawo. Sa iyang pagbalik og sulod, didto na niya madiskobrehi nga samdan na si Pagaling sa ulo. Base sa kuha sa CCTV, ang mga killer nagsakay sa usa ka puti nga van ug motorsiklo. (Superbalita Cebu)