TINUD-ANAY niyang gihangop ang pagserbisyo ngadto sa publiko. Ug suma niya, ang tinuod nga kalampusan wala sa medalya, apan anaa sa maayong pung ug resulta sa imong gihimong kaayuhan.
Si Hildebrando Salibay Ortega o Randee sa iyang mga higala ug banay wa damha nga makatrabaho sa usa ka ahensiya sa gobyerno.
Niya pa, dinhi siya gidala sa sulog sa kinabuhi, ug maikagon niyang gidawat.
“I never planned to work in the government but it is where God led me after working in different private institutions. Working in the government allows me to reach and serve many clients as the government is the biggest employer,” ni Ortega sa Superbalita Davao.
Kasamtangang nagpuyo sa Tagum City, si Ortega didto nahimugso, Oktubre 30, 1976 ug nagbaton og buot sa Surigao City.
Dekada sitenta didto siya nagtungha og elementarya sa Don Bosco Technical High School sa Punta Princesa, Labangon, Cebu City.
Pagka-high school mitabok siya sa Dumaguete Negros Oriental ug didto nagtungha sa Silliman University High School.
Pag-abot sa kolehiyo, gihuman niya ang kursong Bachelor of Science in Commerce major in Management sa Southwestern University sa
Urgello, Cebu City, niadtong 1988.
Wa pay labot niini ang mga trainings ug dugang pagtulun-an nga didto niya gikat-on sa Germany ug Netherlands.
Apan bisan og nakahuman na siya og kurso, pursigido gihapon si Ortega nga makat-on pa, maong mikuha siya og Master of Arts in Theology, 24 units sa Ateneo de Davao University, tuig 1998-2003.
Samtang pagka-2012, mikuha na sab siya og Master of Arts in Theology major in Human Christic Peace Studies sa Holy Cross of Davao College.
Ni Ortega, nadasig siya sa pagkuha og Theology nga kurso tungod nagdako siya sa relihiyosong pamilya.
“Our family is religious. My parents go to church daily and pray the rosary together. While my eldest sister is a contemplative nun of Benedictine Order,” dugang niya.
Alang niya, duol sa iyang kasingkasing ang pagkuha sa Theology tungod mas napaduol siya sa Labaw nga Makagagahum ug nasabtan niya og maayo ang rason sa iyang kamugnaan ning kalibutan.
Tuod man, gihimo ni Ortega ang kaugalingon nga dalan aron mapaambit ang pulong sa Ginoo.
Matag weekend anaa siya sa Dapecol o nakigkolokabildo sa mga piniriso sa Tagum City Jail aron ipaambit kanila ang pulong sa Ginoo.
Tungod ning iyang paningkamot ug kakugi, nahatagan siya og medalya ug Certificate of Recognition sa Catholic Bishops Conference of the Philippines (CBCP).
Ug human ang pagpangempleyo sa pribadong sektor, gitawag ang interes ni Ortega sa pagtrabaho sa Social Security System (SSS).
Sa kasamtangan siya ang OIC/Section Head sa Tellering Section sa Tagum Branch sa SSS nga anaa sa Gaisano Grand.
Ug tuod man, sa iyang pangatundanan, daghan siya og kalambuan nga gipatuman sa iyang departamento alang sa kinatibuk-ang pagserbisyo sa mga kliyente.
Ning bag-o lang, mapasigarbuhong gipadayag ni Ortega ang gipatuman nilang ‘World Class Payment Facility’ sa SSS Tagum branch, inabagan sa suporta sa iyang mga personahe.
“We are proud kay first time ata ni sa tanang payment firms sa SSS nga ingon ani ang process sa payment, way dugay nga paghulat, ug paspas ang flow.”
Dugang ni Ortega nga di kalikayan nga usahay mogasto kas kaugalingon nimong sapi apan, wa nila kini kwentaha tungod nagpasulabi nga mahatag ang kinatibuk-ang pagserbisyo sa uban.
Niya, ang tinud-anay nga pagserbisyo di lamang masukod sa mga pag-ila, pasidungog nga nadawat, apan mas labaw nga maingong ikaw nagmalampuson sa kinabuhi kung dunay nalipay sa gisugdan nimong kabag-uhan.