DILI gayud katuo ang kabanay ni Patrolman Police Officer (PO) 1 Pat Nonie Lad Badbadon sa Manay Municipal Police Station sa Davao Oriental nga nag-suicide ang nasampit nga pulis.
Si PO1 Badbadon napalgan nalang sa iyang mga kaubanan nga dunay igo sa ulo ug naglunang sa dugo sa iyang gihigdaan, alas 6:30 sa buntag niadtong Martes, sud sa kwarter sa 1st Davao Oriental Police Mobile Force Company (DOPMFC) sa Barangay San Ignacio, Manay.
“Buot ni siyang mag-Pastor, imposible kaayo nga mag-suicide ni, dili mi katuo, kay una kung suicide, nasayod siya nga sala kini. Buotan ning bataa kay sa Sta. Ana PNP pa ni siya na-assigned sa una sa akoa ni tigsaka,” tipik sa pagsaysay sa uyoang si Sammy Badbadon pinaagi sa telepono.
Hangtud karon, tanghaga pa gihapon sa kabanay, uban sa katahap nga dunay nagpaluyo sa maong kamatayon.
“Basin og dunay nakabangi siya, tapos giinitan nalang, kinahanglan moguwa gyud ang hustisya,” dugang ni Sammy.
Apan ang kapulisan padayon nga nag-interogar sa ulahing mga nakauban ni PO1 Badbadon ug ang unang nakakaplag sa hitabo.
“Hindi tayo nag-stop sa dyan nalang sa investigation natin, sa halip ginawan natin ng investigation ang mga nakasama niya at ang nakakita sa kanya na dugoan na,” ingon ni Police Major Neil Richard Regalado, hepe sa Manay MPS.
Tanghaga gayod kung matawag kini nga hitabo kung ibutang nga wala naghikog si PO1 Badbadon. Dili lang unta taman sa spot report ang kapulisan diha sa Manay MPS, unta mohimo gayod og lawom ug makuti nga imbestigasyon sa krimen.
Sa di madugay mogawas unta ang hustisya kung gituyo kini pagpatay sa nakalaban, hinumdoman nga walay aso nga makumkom, kini mohungaw gayod.
Ang konsensya labaw pa sa aso, mopatigbabaw kini, di man karon dayon apan sa umaabot nga mga adlaw.
Rest in peace, PO1 Badbadon, Sir!