GINASUBAY na sa kapulisan sa Paquibato Police Station ang insidente sa pagkakaplag sa usa ka kwatro-anyos nga wala nay kinabuhi ug naglutaw sa punong, Huwebes sa buntag, Agosto 29, sa Purok 2, Sitio Mangani, Barangay Tapak, Paquibato District, Davao City.
Ang biktima nailhang si Wendy (bansagon gitago), 4, day care pupil ug nagpuyo sa dapit.
Naabtan na lang sa kapulisan nga naa na sa ilang balay ang biktima nga wala nay kinabuhi human gidala sa iyang mga ginikanan gikan sa pagkakaplag.
Una niini, ala 1 sa kaadlawon, ang amahan nga si Edwin, 28, usa ka membro sa Citizen Armed Force Geographical Unit(Cafgu), nakamata gikan sa pagkahinanok, ug gilayong gipukaw niini ang iyang asawa nga nahinanok sab gikan sa “baylihan” (disco).
Nakurat ang magtiayon dihang wala na sa ilang tupad ang ilang 4-anyos nga anak diin dali nila kining gipangita sa ilang mga silingan, apan wala kini hikaplagi.
Alas 7:45 sa buntag, usa ka Edgar Dalagan, 40-anyos, taga Sitio Panaga, Brgy. Colasas ang nagpahibalo gumikan sa iyang paglibot sa fishpond mga 150 metros ang gilay-on sa balay sa biktima, iyang nakita nga wala nay sanina ang biktima ug naglutaw sa punong.
Gilayong gidala sa iyang mga ginikanan ang biktima sa ilang balay nga wala nay kinabuhi samtang naghulat sa kapulisan alang sa imbestigasyon.
Migula sa pasiunang imbestigasyon nga lagmit nalumos ang biktima, apan natahap ang kapulisan ug pamilya niini gumikan wala na kini sapot.
Nadiskubrehan sab sa kapulisan nga dunay mga bun-og ug samad ang baba niini ug duna say mga samad sa iyang kinatawo.
Wala sab giwagtang sa kapulisan sa ilang imbestigasyon nga posibleng gilugos ang biktima una kini gipatay ug gilabay sa punong.
Ang kapulisan sa Paquibato PNP padayong naghimo og makuting imbestigasyon sa hitabo aron maila ang responsable sa krimen. (Jeepy P. Compio)