NIADTONG Miyerkules sa sayo sa buntag, nahigmata ko sa text message sa akong anak nga nagpa-rescue kay naa pa siya sa Talamban. Mga alas 7:30 naa pa siya sa Talamban samtang nibiya siya sa balay mga alas 5:45 sa buntag. Wa dayon siya makasakay mao naabtan sa paghuot sa mga sakyanan sa dan.
Ako siyang giapas, apan nakurat ko kay bisan mga motorsiklo, di na makaagi. Maayo gani diha pa ko duol sa sityo Huyonghuyong, dali kong nibalik sa agi ug nitipas padung sa Barangay Tawason kay mas dali padung sa Talamban. Wa ko masayop.
Akong naabtan si Dominic sa may Gaisano Grand Mall na. Ang kahuot sa trapiko hangtod ra sa eskina sa Cabancalan kay sa saylo na, moving na ang mga sakyanan. Naabot mi sa tunghaan mga alas 8.
Try to imagine unsa na ka huot ang mga dan sa Barangay Bacayan nga bisan ang two-wheeled nga mga sakyanan, maglisod na sa paglusot. Well, ang karsada gikan sa Talamban hangtod sa Pit-os, two-lane ra gyud. Usahay, naa pay mga driver nga way kaikog, mo-park. Kapila na gud ko matanggong.
Busa, kon tigbiseklita ka nga naa sa area sa Binaliw, Cabangahan, Pit-os ug Bacayan, kinahanglan mga alas 6 pa lang sa buntag, kon ang imong rumbo ang ilang Willy sa Busay, gikan na. Sa alas 9, okay na ipauli kay luag na sagad ang mga sakyanan pagbalik.
PROBLEMA
Ang problema tingali sa kagamhanan sa road expansion gikan sa Talamban padung sa Pit-os mao ang road right of way acquisition. Kon wa pay problema, niadto pa lang sa early 2000 napalapdan na kining mao nga length sa karsada.
Usa ka opisyal kanhi sa Cebu City nisulti nako nga sa 2007 palapdan na ang karsada. Apan 2019 na lang, gamay rang portion ang napalapdan. Mga 95 porsyento wa pa matandog. Kon na-expand pa ning mao nga karsada, di unta mograbe ang problema sa trapiko.
Sukad ko nakamatngon og buot, wa ko makamatngon nga napalapdan ni. Imagine, 70s pa ning karsadaha, wa pa napalapdan unya ang mga namuyo maorag gipilo nag 40 ang gidaghanon.
KON SUPORTADO PA
Nindot unta kaayo nga magbiseklita na lang ang mga trabahante ug estudyante. Kana lagi unta kon dunay mga pasilidad ang mga balay patigayon ug tunghaan aron ang gustong makapanglimpyo sa ilang singot, makahimo ini sa di pa mosud sa trabaho ug klase. Apan wa man ni nga klase sa pasilidad.
Lain man kaayo nga manimahong singot ug aso sa sakyanan nga mosulod sa tapok sa mga tawo, labina kon duna kay bad body odor.
Samtang wa pay klarong solusyon ang problema sa trapiko ug way suporta ang alternative transportation, mag-agwanta lang ta aning problema nga maorag wa pay kahayag ang kasulbaran.