GAMAYNG pag-antos na lang ug smooth na unya ang flow sa atong production,” namulong atol sa production meeting si Mr. Gerald Mejares, ang plant manager. “Usa ka buwan na lang nga pasensya kay hapit na gyud ta mamalhin sa bag-o natong planta didto sa Cebu Light Industrial Park.’
Dako kaayo kinig ngisi kauban ang mga Insek gikan sa kaulohan nga mao kuno kadtoy mga tag-iya.Apan si Mr.Sheng, ang company president, mao ra ang nailhan ni Randy ug hasta ang kadaghanan sa iyang mga kaubang production worker. Sukhawi kaayo ang iyang gibati sa kadaghanan sa mga empleyado labi pa ang habig sa management. Kon unsa sila ka excited, ingon usab siya kasagmuyo.Naghatag kini kaniyag dagko ug daghan nga mga suliran ug kabalaka.Karon pa lang gani natantiya na niya ang gidak-on nga mahidugang unya sa iyang expenses alang sa pamilite.Dako na usab siyag igahin nga oras sa pagbiyahe sanglit aduna may gilay-on ang Lapu-Lapu. Lahi sa sitwasyon niya karon nga atbang lang sa iyang balay ang planta.Ug ang labi pa niyang gikabalak-an mao ang hagbay ra niyang gidala-dala nga balatian.Masustinihan ba niya unya ang giingon sa usa niya ka silingan nga maglakaw sila paingon sa gate sa Cebu Light Industrial Park kon lapas na sa alas diyes sa gabii ka mogawas sa trabaho tungod kay hangtod man lang sa alas nuybe ang biyahe sa shuttle bus ning maong lokasyon.Basin mo-grabe pa unya ang iyang atraytis ug hubak kay sa iyang paminaw segurado man gyud siyang makabaklay, kay kalagmitan hangtod man sa alas dos sa kaadlawon ang duty sa second shift.
“Pagka wala lamang gyuy pagpakabana sa kahimtang sa uban ang utok ning maong kalambuan,” bagulbol ni Randy Wala lamang sila maghunahuna unsa kalisod unya sa among mahiaguman.Abi kay manager man sila ug wa silay duty sa gabii maong nagtuo lang gyud silag lalim nga lakwon ang baleg duha ka kilometro’
Mao kini ang iya karong gihinuktokan.Gibalanse niyag maayo ang sunod o pagahimuon niyang hukom.Kinahanglan na gyud niyang mo-desisyon sanglit ugma mao na ang inagurasyon sa bag-o nilang planta.Ug maoy nakab-ot sa siyang hunahuna nga mo -avail na lang siya sa early retirement nga programa sa kompaniya alang sa mga trabahante nga nag edad og singkwenta..Nausikan unta siyang maghunahuna nga mokabat gyod untag kapin milyon kon unya pa siya moretiro inig ka saysenta apan sa iyang pangagpas kuli na siyang makalahutay niini.
“Okey. Apan kinahanglan pa nimong moduty og baleg tulo ka buwan didto sanglit 3 months man una kini mo take effect.”pamahayag ni Mr. Gerald Mejares ngadto kang Randy.
Hapit na motulo ka buwan nga pagbinaklay ni Randy matag kaadlawon dinhi sa bag-o nga lokasyon sa iyang trabahoan ug adunay nahinumdoman siya.Bisan kausa wala na mosugmat ang iyang arthritis ug ingon man ang iyang hubak.Nahibulong apan nalipay siya niini.Ug ang usa pa gyud nga namatikdan niyang kausaban kay nahibalik ang iyang kalagsik.Ug nadugangan pa gyod ang iyang kalipay dihang nagpa-check up siya sa ilang company doctor.
“Uy! Normal man ang tanang result sa imong laboratory.” matod sa doktor.”Tingali regular ka na nga nag exercise’
“W-wala baya ,Dok”
Wala mag –usik og higayon si Randy.Tulin pa sa kwetis nga miadto siya sa opisina sa ilang HR manager aron bakwion ang gi pass niyang early retirement form.Nasuta niya karon sa iyang kaugalingon nga kaya pa niyang motrabaho hangtud saysenta.Ug pagkahuman,mao na usay girumbo sa iyang mga lakang ang opisina ni Sir Gerald kinsa maoy gitugyanan sa company president aron mangitag yutang baligya aron katukoran ug building kay nag- abang man lang gud kinig luna didto sa Mandaue.Iya kining pasalamatan kay ang gibuhat niiini nakatabang ngadto kaniya. (KATAPUSAN)