Nalzaro: ‘No cigarette day’ ni Bebot

GUMIKAN sa kadaghan na kaha sa mga balaod nga ang uban wala na gani ma-implementar, bisan unsa nalang ang mahuna-hunaan sa atong mga magbabalaod nga himuong balaod. Ang uban mahulog na lang nga kataw-anan o hinanggaw. Sama niadtong gipangamahanan ni Lapu-Lapu City Congresswoman Paz Radaza nga dili na ipatawag og lapu-lapu ang isdang lapu-lapu kay insulto kuno sa atong bayani nga si Lapu-Lapu. Pugapo nay ipahingalan.

Ang Ako Bicol partylist misang-at usab og balaodnon nga kon mogamit og condom atol sa pag-esmiringhoy ug kon tangtangon, puwedeng makiha ang lalaki og sexual assault o rape gyud. Kinsa man unya ang mosaksi nga gituyo pagtangtang o natangtang lang og iya kay mihiyos ang sa lalaki? Pagka-way hinungdan.

Si Senador Grace Poe duna say balaodnon nga dili pahatagan og homeworks ang mga tinun-an sa elementarya sa mga pribado ug publikong eskuwelahan atol sa weekend kay aron mahatagan og igong panahon nga maglingaw-lingaw uban sa pamilya. Dili gusto si Senador Poe nga mabug-atan ang mga bata. Hayy naku, mas mobugo ang bata kon dili magtuon.

Karon si Kongresista Rodrigo ‘Bebot’ Abellanosa sa Cebu City south district ang pabut-on, gikinahanglan nga adunay ‘no cigarette day’ matag buwan. Gusto niya nga way manigarilyo ug mobaligya sigarilyo bisan usa ka adlaw matag buwan. Every 15th of the month ang iyang gusto nga ‘no cigarette day’.

Gidili naman gyud nang pagpanigarilyo ubos sa balaod. Gani wala na tuguti ang advertisement sa sigarilyo sa mga media, radio, television, newspapers ug billboard. Unya diha mismo sa kaha sa sigarilyo dako kaayo ang warning nga ‘smoking is dangerous to your health’. Naa pay hulagway ni kamatayan.

Taas pa kaayo ang excise tax sa sigarilyo sama sa bino aron ma-discourage ang mga tawo nga manigarilyo. Unya kinahanglan pa ba og balaod ana? Unsaon man na sa pag-implementar kon motago ang tawo nga gustong manigarilyo? Wala man gani masumpo ang ilegal nga drugas nga ilegal gyud na siya unya dako kaayo og silot.

Gipamatay naman gani nang uban. Pasagdi nang mga tawo nga gustong mamatay sa pagpanigarilyo, Congressman Bebot. (bobbygnalzaro@gmail.com)

Related Stories

No stories found.
SunStar Publishing Inc.
www.sunstar.com.ph