MAGSUGOD na karong adlawa ang bulan nga “BER.” Buot ipasabot, Christmas season na sa Pilipinas.
Sa Sugbo, kining Christmas season mahuman sa ikatulong Dominggo sa Enero 2020 nga mao ang kasaulogan sa Sinulog festival.
Sa atong kasinatian, angay na magsugod karon ang mga preparasyon alang sa Sinulog 2020.
Mas mahinungdanon karon ang Sinulog 2020 kay mao kini ang preparasyon alang sa 2021.
Nakahibawo na man kita nga ang 2021 mao ang ika-500 nga tuig sukad naabot si Ferdinand Magellan sa Sugbo ug gipahigayon ang unang pagbunyag sa mga Sugboanon isip Kristiyano.
Nag-una sa gibunyagan sa mga prayle nga kuyog ni Magellan mao silang Rajah Humabon ug Rayna Juana.
Dayon gihatagan ni Magellan si Rayna Juana og gasa nga mao ang imahen ni Mama Mary ug sa iyang Anak nga si Santo Niño.
Mao kini ang pagsugod sa paggamot sa Kristiyanismo dinhi sa Pilipinas ug sa tibuok SouthEast Asia.
Mao kini gi-reenact nato kada tuig human sa Fluvial Parade ug sa dili pa ang Solemn Procession nga isip kasaulogan sa Pista ni Senyor Santo Niño.
Inig sunod adlaw mao na ang ang Grand Parade.
Karong 2021 mao ang ika-500 nga sumad o ika-5 nga sentenyal sukad niadtong maong hitabo.
COA
Angay na unta karon magsugod kita sa mga preparasyon alang sa Sinulog 2020.
Abi nato og magsugod na kay human napili pagbalik si Vice Mayor Mike Rama nga chairman sa Sinulog Foundation Inc. Board of Trustees, ila mang gipahigayon ang usa ka strategic planning session.
Apan kalit lang nausab ang sitwasyon dihang nagpakanaog og Executive Order si Mayor Edgar Labella nga magtukod og usa ka Sinulog board diin sakop na lang si Sinulog Foundation Inc. ug si Mayor Labella ang magtudlo sa mga sakop.
Sa akong tan-aw, mas makumplikado ang mga preparasyon kay gipaapil man ni Mayor Labella si Gob. Gwen Garcia.
Nasuko si Vice Mayor Rama niini kay wala siya pahibaw-a sa maong lakang sa mayor.
Isip nagsud-ong sa mga kalambuan sa syudad, nagduda ko nga dunay kalambigitan kini sa duha ka butang:
1. Politika kay posible man nga magbangga alang sa pagka mayor si Labella ug si Rama karong 2022.
2. Ang minilyon nga pundo sa Sinulog. Gani, usa sa isyu nga giisa mao ang transparency.
Duna lang koy pangutana. Usa sa rason nganong gitukod ang Sinulog Foundation Inc. kaniadtong 1984 mao ang paglihay sa COA. Andam na ba ang Cebu City Hall ubos ni Mayor Labella nga motuman sa COA rules and regulations? Sa akong nabal-an man gud, ang SGV maoy nag-audit sa pundo sa Sinulog. (@anol_cebu sa Twitter)