Mambáling” dili “Mambalìng” ang akong paglitok sa maong barangay nga maoy nahimutangan sa akong parokya. Duol man god kini sa baybayon kaniadto ug daghan ang mangisda didto. Ang mangingisda mambáling inigitsa nila sa ilang pukot ngadto sa dagat aron managat. Gisaulog namo ang Pangilin ni San Roque niadtong Domingo Agosto 25, binasi sa usa ka dibektibo ni anhing Cardinal Vidal nga miila sa parokya isip “Archdiocesan Shrine” sa maong santo. Tungod sa kadaghan sa mga deboto sa maong santo, makaingon kita nga siya gigasahan sa Ginoo sa pagpamáling. Ug daghan siyag kuha tungod sa iyang pagsunod kang Cristo.
Human sa daghang kalihokan gumikan sa maong piyesta, nakadesidir ko sa paghimo og usa ka “spiritual retreat” didto sa Jesuit Retreat House sa Malaybalay, Bukidnon. Didto, inubanan sa usa ka “retreat director”, gipamalandongan nako ang daghang mga butang. Nakaamgo ako nga ang labing mahinungdanong serbisyo nga akong ikadalit sa mga parokyano mao ang presensiya nga mapaubsanon. Ang mapaubsanong tawo man god kanunayng nagtuon, dili gikan sa libro kondili gikan sa kasinatian lakip na sa iyang mga sayop. Matinud-anon ug tukma man god ang pagtan-aw sa maong lider sa iyang kaugalingon.
Mao nga gipahimangnoan kita ni Jesus sa pagpaubos “kay ang tanan nga magpahitaas sa iyang kaugalingon ipahiubos; ug siya nga magpahiubos sa iyang kaugalingon, ipahitaas”. Mihatag siya og usa ka situasyon: “Kon dapiton ka gani sa usa ka tawo ngadto sa kombira sa kasal, ayaw og lingkod didto sa hamiling luna, kay basin og adunay tawo nga labaw pa kadungganan kanimo nga iyang usab nga dinapit...” Kay basin pabayloon sila og lingkoranan ug mapaulawan ang nagpatugatuga og lingkod.
Sa mga kombira man god kaniadto, sama karon, adunay gitawag nga “presidential table”. Kon kinsay masduol sa nagdapit, mas taas ang bili sa mata sa katilingban. Mao nang buot gyod nga magpaduol sa nagkombira. Ang dili mangita og hamiling lugar, ang wala magpa-“feeling entitled”, nagpaubos. Dugang pa niini, kon kita ang mohikay, dili nato dapiton ang mga tawo nga makabalos kanato kondili ang mga walay ikabalos. Timailhan pod ni sa pagpaubos. Dili “power trip” ang atong gipangita kay wala man tay makuha.
Sa pulong pa ni Sirac, ang tawo nga mapaubsanon labaw pa nga higugmaon kaysa tawo nga mohatag og gasa sa uban. Ngano man ni? Ang mapaubsanong tawo man god moila sa bili sa uban kay dili siya kinahanglan mopunting sa kaugalingon. Ang mapahitas-on kanunayng gahangak sa pakiglumba sa uban ug pagpaniguro nga siya kanunayng numero uno. Di kita komortable uban kaniya.
Ang pagpaubos maoy sinugdanan sa atong panaw sa langit nga gilarawan sa sulat ngadto sa mga Hebreo. Ang “mga espiritu sa mga matarong nga gihimo og hingpit” mao ang mga tawo nga nagpaubos. Nadawat nila ang makaluwas nga dugo ni Jesus.
Nagsugod na ba ang atong pagpaubos aron daghang makuha ang atong pagbáling?